PNTL identifika suspeitu na’in-rua supeitadu ba krime burla agravada
DILI, 08 Outubru 2027 (TATOLI)–Komandu Polísia Nasionál Timor-Leste (PNTL) liuhusi Diresaun Servisu Investigasaun Kriminál (DSIK) halo ona identifikasaun ba suspeitu na’in-rua ho inisiál ZLO no AX husi Empreza Plar Kretivu Furak, ne’ebé supeitadu ba krime burla agravada.
Empreza Plar Kretivu Furak liuhusi nia pesoál na’in-rua bosok ema na’in-600 resin hodi hatama osan.
“Ita-nia maluk sira ne’ebé sai hanesan vítima nomós ofendida, horsehik sira hotu mai iha ita-nia DSIK hodi aprezenta keixa katak iha pesoál balun ne’ebé mak durante ne’e bosok hela sira, ne’ebé durante ne’e foti sira-nia osan depois mak dehan atu importa karreta no motorizada, no fim empreza ne’e mós iha problema katak motorizada no karreta sira ne’e até prezente data la mai,” Diretór interinu DSIK, Superintendente Asistente Polísia Angelo Quelo, hato’o liuhusi konferénsia imprensa ne’ebé realiza iha Komandu Jerál PNTL, Kaikoli, Kinta ne’e.
Notísia relevante : Tribunál julga Antigu Vise-MNEK JdS ba krime burla agravada
Nia dehan, empreza Plar Kretivu Furak iha ona konkordánsia ho vítima sira atu devolve fali osan maibé até agora empreza seidauk bele devolve.
“Iha fulan kotuk sira halo akordu ida iha Eskudra Bekora, katak loron 07 ne’e empreza atu devolve sira-nia osan mas tanba horisehik dehan to’o a data ne’ebé mak determina osan laiha ka empreza na’in ne’e laiha osan atu devolve vítima sira-nia osan, nune’e vítima konsentra iha Sede Suku Metiaut depois balun iha Bekora. Ne’e mak Komandante Eskuadra Bekora kanaliza informasaun mai no vítima sira mai hotu iha ne’e,” nia akresenta.
Autoridade Seguransa asegura no identifika hela suspeitu sira no foti ona deklarasaun, nune’e halo mós komunikasaun ho na’in ba empreza.
“Neste momentu ita rekolla ona iha ema na’in-523, ami halo hela identifikasaun ba sira parese que seluk sente envolve hotu ka sai vítima ba kazu ida-ne’e bainhira sira rona, sira sei mai tan, ohin mós barak sei hambriik hela portaun ne’ebá,” nia relata.
Empreza Plar Kretivu Furak bosok vítima sira ne’e hodi hatama karreta hamutuk 14, nune’e sira fó osan kada ema hatama osan Down Payment (DP) ho montante $2.525 no ba motorizada iha ema na’in-523 mak hatama osan kada ema hatama osan DP $285, nune’e to’o agora sasán sira seidauk mai.
“Prosesu ba kazu ida-ne’e lao hela, vítima sira ne’ebé mak foin mai ne’e mós ita tenke halo identifikasaun nafatin hodi fó informasaun pois ita entrega autus ne’e ba Ministériu Públiku para enkamiña ba Tribunál atubele prosesu ba empreza no suspeitu,” nia katak.
Vítima sira durante ne’e fó osan ba empreza ho montante totál $50.395,55.
“Agora ita avansa fali ba identifikasaun suspeitu sira, espera katak aban ne’e bele aprezenta ona ba Ministériu Públiku, tanba ema barak presiza mós asegura, parte rua vítima sira tantu suspeitu ita asegura,” nia katak.
Bazeia ba Ministériu Públiku nia orientasaun ba kazu ne’e nudar prosesu normál la’ós detensaun ho fraglante delitu.
“Ita tenke kumpre orientsaun husi Ministériu Públiku, ita halo identifiksaun hodi asegura labele halo detensaun fraglante delitu mas ita halo prosesu normál. Iha pasadu sira (empreza Plar Kretivu Furak) komete kazu hanesan, mas kuandu na’in ba prosesu hateten mai katak ida-ne’e, entaun ami tenke halo tuir ida-ne’e,” nia dehan.
Jornalista : Natalino Costa
Editora : Julia Chatarina
