Fundasaun Mahein konsidera PNTL presiza moderniza-an hodi hetan rekursu kualifikadu

DILI, 09 Outubru 2026 (TATOLI)–Diretór Ezekutivu Fundasaun Mahein, Nelson Belo, konsidera tempu ona Polísia Nasionál Timor-Leste (PNTL) moderniza-an hodi rekruta rekursu kualifikadu nune’e bele oferese servisu adekuadu ba públiku.

“Agora ne’e ita aliadu ba ASEAN (Asosiasaun Nasaun Sudeste Aziátiku), CPLP (Komunidade nasaun ko’alia lian portugés), Pasífiku ita sei ba Indopasífiku, entaun ita tenke tenta para Timor-Leste tenke hasa’e nia kualidade instituisaun sira ne’e. Fundasaun Mahein rekomenda atu polítiku na’in sira, liliu Konsellu Ministu tenke haree fali ida-ne’e husu Komisaun lori fali ba Ministru Interiór para iha diskusaun kle’an ida hodi haree númeru ba regra ne’ebé sira tau ba liu grau ida-ne’ebé tau tinan ona iha kritériu ne’e. Ida-ne’e presiza mantein ka halo fali ajustamentu ba rezultadu ne’ebé mak iha,” Diretór Ezekutivu hahaten ba Jornalista sira iha ninia knaar fatin, Hudi-Laran, Sesta ne’e.

Notísia relevante : Komandu PNTL prefere kouta pursentu 20 iha vaga rekrutamentu PNTL

Tuir Komisaun nia rekezitu, kada aplikante tenke to’o valór 67 (tuir padraun rejionál), bainhira la to’o ne’e tama iha eliminasaun.

“Ha’u haree bele ona ba tempu ida agora, tanba sá mak tau volór ida hanesan, tanba ita agora ameasa ida-ne’ebé mais matenek, sufistikadu, mais abrajante no sein fronteira, entaun presiza Polísia ida-ne’ebé mak ninian kapasidade ne’e mós mais rigorozu,” nia akresenta.

Jerente instituisaun ne’e dehan, bainhira halo rekrutamentu no fó valór la tuir padraun maka sei la ajusta ba amesa sira ba krime transnasionál no seluk tan.

“Tuir Fundasaun Mahein nia preferénsia, valór ne’ebé Komisaun fó ne’e naton ona, standar ona, ne’e justifika ona kualidade. Ita la’ós rekruta Polísia ne’ebé barak liu maibé ita hakarak Polísia kualidade, ne’ebé se rekrutamentu ida-ne’e kouta ba kada munisípiu ne’e la to’o, entaun rekrutamentu loloos ho nível nasionál mak ne’e duni,” nia katak.

Tuir Fundasaun Mahein nia observasaun ba rezultadu teste horsehik ne’e obriga komisaun atu halo violasaun ba regra ne’ebé mak sira tau.

” Agora iha ne’e iha tentativa rua, mantein kona-ba regra ne’ebé mak tau ona ne’e ka ajusta ba rezultadu ne’ebé mak iha ho tentativa boot ne’ebé mak iha,” nia hato’o.

Fundasaun Mahein fó rekomendasaun ba komisaun atu mantein padraun ne’ebé mak Komisaun fó sai ona, labele ingata ba rezultadu ne’e tanba iha kualidade Polísia ne’ebé mak di’ak maibé tanba rezultaldu ne’e sei aviza, katak sei la atinje kouta ne’ebé mak rekruta ba 750, tanba ne’e tenke buka mekanizmu seluk ne’ebé ajusta tuir rezultadu.

Iha biban ne’e, Diretór Ezekutivu Fundasaun Mahein husu ba Governu atu toma atensaun ba kestaun hitu hodi mellora liután rekrutamentu ba aplikante vaga membru PNTL foun :

1. Halo avaliasaun ba fasilidade formasaun ne’ebé eziste. Halo avaliasaun ofisiál ba fasilidade formasaun iha Komoro, Rai Robo no fatin seluk ne’ebé PNTL uza atu determina kapasidade reál, kondisaun alojamentu, saneamentu, kuidadu saúde no espasu aprendizajen.
2. Implementa rekrutamentu regulár kada tinan. Planeia rekrutamentu kandidatu na’in-250 kada tinan, ho ajustamentu tuir nesesidade Polísia nasionál, disponibilidade orsamentu, kapasidade instrutór sira no númeru kandidatu ne’ebé fasilidade bele treina ho seguru no efetivu.
3. Prevene fasilidade atu la nakonu liu. Asegura katak númeru kandidatu la liu kapasidade seguru ne’ebé determina ona. Bainhira presiza, organiza formasaun iha grupu kiik liu ka hala’o formasaun iha turnu oioin.
4. Hadi’a bem-estar kandidatu sira. Fornese alojamentu ne’ebé adekuadu, bee moos, saneamentu, kuidadu médiku, apoiu psikolojiku no espasu apropriadu ba aprendizajen no treinamentu fíziku.
5. Harii sentru formasaun PNTL permanente. Dezenvolve instituisaun espesífika ho alojamentu, sala aula, fasilidade médika, kampu treinamentu fíziku no fatin ba ezersísiu prátiku polísia. Fasilidade formasaun F-FDTL iha Metinaro bele sai hanesan referénsia ida, hamutuk ho ezemplu apropriadu hosibnasaun seluk.
6. Investe iha kualidade formasaun. Hametin dezenvolvimentu profisionál instrutór sira no asegura katak formasaun inklui abilidade operasionál, direitus umanus, étika polísia, disiplina, responsabilidade no polisiamentu komunitáriu.
7. Estabelese mekanizmu monitorizasaun ba rezultadu. Avalia saúde kandidatu sira, prezensa, rezultadu aprendizajen, taxa konkluzaun formasaun no prontidaun profisionál atu asegura katak investimentu públiku prodús rezultadu ne’ebé efetivu.

Jornalista     : Natalino Costa

Editora          : Julia Chatarina