Ministru Klamar Fuik hetan vizita husi omólogu xineza iha Ospitál Militár Beijing
DILI, 09 Outubru 2026 (TATOLI)–Ministru Defeza, Kontra Almirante Donaciano Costa Gomes ‘Pedro Klamar Fuik’ daudaun halo hela tratamentu saúde iha Ospitál Militár iha Beijing, Xina.
Governante ne’e hetan vizita husi nia omólogu Ministru Defeza Repúblika Popular Xina, Almirante Dong Jun.
“Durante vizita ne’e, Exelentísimu Ministru Defeza Xina iha oportunidade hodi hatene pesoalmente kona-ba kondisaun rekuperasaun nia omólogu timorense, iha jestu amizade no aprosimasaun ne’ebé refleta relasaun, kooperasaun no amizade ne’ebé eziste entre país rua, partikularmente entre Ministru Defesa sira-nian,” sita husi nota ne’ebé Ajénsia TATOLI asesu, Sesta ne’e.
Notísia relevante : Gabinete Ministru Defeza klarifika Ministru Pedro Klamar Fuik nia kondisaun saúde
Enkontru ne’e permite mós troka hanoin badak kona-ba asuntu interrese bilaterál, ho destake partikulár ba kooperasaun iha área defeza no ba projetu konstrusaun Ospitál Amizade Timor-Leste-Xina, ne’ebé hanesan inisiativa referénsia ida iha ámbitu kooperasaun entre país rua.
Hetan mós referénsia espesiál ba tratamentu inovadór ne’ebé Ministru Defesa Timor-Leste hetan iha Ospitál Militár Beijing, ne’ebé nia rezultadu hatudu kontribui ho forma signifikativa ba bem-estar no rekuperasaun.
Enkontru ne’e hatudu lasu amizade, solidariedade no kooperasaun entre país rua.
Jornalista : Natalino Costa
Editora : Julia Chatarina
