Brigadeiru Jenerál Trix husu FAJ atu hametin integridade, disiplina no koezaun iha F-FDTL

DILI, 10 Outubru 2026 (TATOLI)–Xefe Estadu-Maiór FALINTIL–Forsa Defeza Timor-Leste (F-FDTL), Brigadeiru Jenerál José da Costa Soares “Trix”, husu ba membru Forsa Apoiu Jerál (FAJ) atu hametin integridade no disiplina, hodi haforsa koezaun iha Komandu F-FDTL.

“Ha’u husu ba membru idaidak, liuliu membru FAJ, atu mantein hahalok ezemplár iha sosiedade ne’ebé fó fiar ba ita-nia kapasidade atu garante seguransa. Misaun ida-ne’e ezije disiplina, respeitu, onestidade no unidade, ne’ebé sai hanesan kompromisu loroloron nian atu servisu ba populasaun, povu no pátria,” nia hateten iha nia intervensaun durante serimónia komemorativa aniversáriu daruak FAJ, ne’ebé hala’o iha Sentru Instrusaun Komandante Nicolau Lobato, iha Metinaru, Sábadu ne’e.

Brigadeiru Jenerál Trix mós apela ba membru F-FDTL, liuliu FAJ, atu hametin koezaun interna iha instituisaun, inklui relasaun entre superiór no subordinadu, hodi asegura katak servisu ba instituisaun no povu bele hala’o ho di’ak.

“Ha’u mós apela atu hametin relasaun interna entre superiór no subordinadu, entre unidade sira no entre jerasaun sira, husi jerasaun 01, 02 to’o jerasaun ohin loron. Ita sai forte liután bainhira ita hamutuk, maibé, bainhira ita fahe malu, ita sei hafraku ita-nia instituisaun no ita-nia pátria, ne’ebé ita hotu jura atu serbí,” nia afirma.

Nia mós fó parabéns ba superiór no membru FAJ sira-ne’ebé selebra aniversária daruak kriasaun forsa ne’e. Nia hato’o agradese ba família militár sira-nian ne’ebé kontinua fó apoiu ba membru sira.

“Parabéns ba FAJ no obrigadu ba família FAJ nian ne’ebé kontinua apoia membru militár sira to’o ohin loron. Ha’u mós hato’o agradese espesiál ba asesór sira, liuliu husi Austrália, Portugál no Nova Zelándia, ne’ebé kontinua akompaña FAJ. Obrigadu barak ba imi-nia kooperasaun, amizade no solidariedade,” nia dehan.

Komandu F-FDTL husu apoiu ekipamentu ba FAJ

Iha serimónia ne’e, Brigadeiru Jenerál Trix husu mós ba Governu atu aumenta apoiu ekipamentu ba FAJ, hodi haforsa kapasidade operasionál no profisionalizmu forsa ne’e, ne’ebé iha kna’ar importante iha apoiu ba operasaun sira-ne’ebé hala’o husi F-FDTL.

Nia esplika katak ekipamentu no infraestrutura ne’ebé limitadu bele afeta prontidaun operasionál forsa armada nian.

“Bainhira laiha apoiu, operasaun labele hala’o ho di’ak, no bainhira laiha sustentasaun, prontidaun forsa armada nian sei afetadu. Ha’u rekoñese katak sei iha buat barak atu halo, tanba ekipamentu no infraestrutura barak mak seidauk iha. Tanba ne’e, ita presiza tau-matan ba nesesidade hirak-ne’e,” nia tenik.

Nia hatutan katak Komandu F-FDTL la ignora difikuldade sira-ne’ebé hasoru, maibé kontinua buka dalan atu ultrapasa obstákulu hirak-ne’e.

“Ida-ne’e mak parte husi ita-nia esforsu loroloron. Instituisaun rekoñese katak rekursu ne’ebé ita iha seidauk sufisiente. Maibé, oinsá ita responde ba limitasaun hirak-ne’e mak sai medida ida ba karakter no kompromisu ema hotu ne’ebé servisu iha instituisaun,” nia subliña.

Iha parte seluk, Komandante FAJ iha Metinaru, Tenente-Koronél João Bosco Ximenes “Lenok”, dehan katak aniversáriu daruak ne’e marka tan istória importante ida iha prosesu dezenvolvimentu instituisaun FALINTIL–F-FDTL.

Nia esplika katak serimónia komemorativa ne’e sai mós hanesan oportunidade ba militár feto no mane husi FAJ atu reflete kona-ba pasadu, avalia servisu ne’ebé hala’o ona no reafirma fidelidade ba Komandu FALINTIL–F-FDTL no Nasaun.

“Serimónia ne’e la’ós atu komemora de’it aniversáriu, maibé mós atu hatudu ba entidade sivíl no militár sira katak, maski FALINTIL–F-FDTL hasoru dezafiu barak, ho vizaun no lideransa forte husi Komandu, ita kontinua lori instituisaun ne’e ba dalan modernizasaun no profisionalizmu, hodi serbí povu no nasaun ohin no iha futuru,” nia dehan.

Lori membru FAJ sira hotu nia naran, Tenente-Koronél João Bosco Ximenes hato’o agradese ba forsa defeza husi Austrália, Portugál, Xina, Estadu Unidu Amérika, Nova Zelándia no Japaun, ne’ebé fó apoiu ba planu no atividade formasaun militár.

Nia mós subliña katak FAJ nu’udár komponente fundamentál ida iha estrutura F-FDTL. Tuir Estatutu Orgániku F-FDTL, Dekretu-Lei Nú. 26/2023, Artigu 37.º, FAJ iha misaun atu fó apoiu kombate, apoiu servisu ba operasaun, apoiu supletivu ba autoridade sivíl, apoiu ba kompromisu internasionál no garante formasaun ba militár sira.

“Maluk ofisiál, sarjentu no sira seluk, nu’udár Komandante FAJ, ha’u husu atu militár hotu kontinua hala’o kna’ar ho firmeza, dedikasaun, matenek, disiplina no responsabilidade. Ita tenke kumpre misaun hotu ne’ebé atribui mai ita, bazeia ba lei ne’ebé temi ona no orden husi Komandu FALINTIL–F-FDTL, no kontinua buka dalan atu hadi’a ita-nia servisu,” nia apela.

Iha serimónia ne’e, Tenente-Koronél João Bosco Ximenes mós husu ba Komandu F-FDTL atu aumenta apoiu ekipamentu, hodi moderniza no hadi’a kapasidade servisu FAJ nian.

Jornalista: Natalino Costa

Editór: Xisto Freitas da Piedade