Dezeñu harii monumentu iha rotunda sira, Autoridade RAEOA submete ona iha MPIE

OEKUSI, 12 Outubru 2026 (TATOLI) – Autoriade Rejiaun Administrativa Espesiál Oekusi Ambeno (RAEOA), lideradu Régio da Cruz Salu, submete ona dezeñu no BoQ iha Ministériu Planeamentu Investimentu no Estratéjiku (MPIE) hodi harii momumentu ba rotunda ualu ne’ebé eziste hela iha área urbana no konstruídu dezde 2015 iha implementasaun projetu estrada pakote I no pakote II husi kompañia Waskita Karya.

Régio da Cruz hateten, dezeñu no BoQ hirak-ne’e, prepara husi Diresaun Servisu Rejionál Obra Públika no Diresaun Rejionál Ajénsia Planeamentu, no rotunda dahuluk sei deside ona sei fó omenajén Padroeiru Santo António Nispenu Oekusi.

“Rotunda sira iha Oekusi, ita-nia planu atu harii monumentu sira tanba ai-funan ita kuda daudaun ona, ne’ebé monumentu primeiru iha Sumlili, ami aprezenta ona ba iha MPIE, kona-ba harii monumentu iha rotunda dahuluk ne’e, tau jardim Padroeira Santo António Nispenu Oekusi,” nia hataten iha Oekusi, ohin.

Nia esplika, planu ne’e, Autoridade RAEOA informa direita ona mós ba iha Entidade Tuteladu Superentendente RAEOA Primeiru-Ministru (PM), Kay Rala Xanana Gusmão, kona-ba harii monumentu Padroeira Santo António iha Oekusi.

“Ha’u informa ona mós ba ita-nia entidade tuteladu Maun Boot, katak ema hothotu bainhira mai Oekusi, reja husu bensaun husi Santo António iha Kapela Níspenu, maibé seidauk omenajén ba Santo António, ami-nia estrutura ida-ne’e, antes ami halo buat barak, ami sei hahú ho omenajén ida ba Nai Santo António,” autoridade másima RAEOA ne’e dehan.

Alta entidade RAEOA ne’e énfaze, kustu atu harii monumentu ba rotunda ualu sei gasta to’o rihun $500-resin, tanba ne’e nia verba sei mai husi Fundu Espesiál Dezenvolvimentu (FED) inklui mai husi Konsellu Administrasaun Fundu Infraestrutura (KAFI).

“Dezeñu sira prepara ona husi Obra Públika no Diresaun Ajénsia Planeiamentu ami diskute ona, no fó ona ba iha MPIE, maibé husi parte MPIE dehan sei haree orsamentu atu bele harii, tanba ne’e kustu liuhusi rihun $500-resin sei tama iha FED bele husi fundu infraestrutura karik FED labele prevee, ami to’o agora laiha opsaun ida kona-ba harii tan monumentu sira iha rotunda, maibé Santo António tenke hahú uluk antes ba sira seluk,” dirijente ne’e dehan.

Notísia relevante:Autoridade RAEOA kompromete moderniza monumentu Masakre Maquelab

Entretantu, rotunda ne’ebé ejiste ona, hamutuk ualu, komesa husi estrada diresaun klaran, hanesan rotunda dahuluk iha Sumlili, Oésono, Sikluli, Padimau, merkadu tradisionál Numbei no Masin, husi diresaun tasi-ibun iha rotunda rua hanesan Um de Maiu Palaban no aeroportu Rota do sândallo.

Jornalista: Abílio Elo Nini

Editór: Rafael Ximenes de A. Belo