FRETILIN husu akompaña timoroan ne’ebé envolve kazu violasaun seksuál iha Dungannon
DILI, 12 Outubru 2026 (TATOLI) – Deputada husi Bankada Frente Revolusionária Timor-Leste Independente (FRETILIN), Cristina Yuri Ribeiro, husu ba Ministériu Negósiu Estranjeiru no Kooperasaun (MNEK), liuhusi misaun diplomátika atu akompaña timoroan na’in-rua ne’ebé envolve kazu violasaun seksuál iha Dungannon, Irlanda Norte.
Nia dehan kazu ne’e agora liu ona husi prosesu tribunál, no ema na’in-rua ne’ebé envolve iha kazu ne’e hetan sentensaun tinan neen kada ida, ho parte husi sentensaun atu kumpre iha prizaun no parte seluk ho lisensa no deportasaun.
“Ita la mete ba prosesu justisa ne’ebé autoridade Irlanda do Norte hala’o. Maibé, kazu ida-ne’e iha impaktu ba komunidade Timor-Leste iha Dungannon no área sira besibesik”, nia levanta iha reu niaun plenária Parlamentu Nasionál, ohin.
Tanba ne’e, nia sujere ba MNEK atu haree kazu ida-ne’e ho seriedade no responsabilidade diplomátika, no halo koordenasaun ho autoridade relevante no reprezentasaun Timor-Leste atu hatene situasaun komunidade timoroan sira iha ne’ebá.
Governu tenke asegura katak timoroan sira seluk ne’ebé hela, estuda no serbisu iha Dungannon la sai vítima diskriminasaun, estigma no tratamentu la apropriadu tanba kazu ida-ne’e.
“Ezemplu hanesan iha nasaun sira seluk ne’ebé imigrante sira hetan ataka husi rai-na’in, hanesan iha Fransa no seluk tan. Ha’u fiar katak responsabilidade Governu la para iha fronteira Timor-Leste. Bainhira ita-nia sidadaun sira iha rai-li’ur, sira nafatin sai responsabilidade nia Estadu”, nia dehan.
Vise-Ministru ba Asuntu Parlamentár, Adérito Hugo, hatete MNEK liuhusi misaun diplomátika iha Inglaterra automátikamente bainhira timoroan sira komete irregularidade ruma sempre iha akompañamentu no apoiu legál. “Ho asuntu ne’e, ha’u sei envia ba membru Governu tutela hodi fó atensaun”, nia dehan.
Tuir publikasaun notísia husi BBC ne’ebé Tatoli sita, timoroan na’in-rua, ida ho idade 20 no seluk 21, ne’ebé viola feto iha parajen subterráneu iha County Tyrone, Irlanda Norte, hetan pena prizaun.
Krime violasaun seksuál ne’e akontese iha loron 10 Setembru 2023, bainhira sira na’in-rua sei iha tinan 17. Parte husi akontesimentu ne’e grava husi kámara vídeo vijilánsia (CCTV). Iha tempu ne’ebá, vítima tinan 19.
Iha loron Kinta, 01 Outubru, iha Tribunál Crown Downpatrick, juís kondena sira na’in-rua ba pena prizaun tinan neen. Husi pena tinan neen ne’e, tinan tolu sei hala’o iha prizaun no tinan tolu seluk sei hala’o iha li’ur prizaun, ho kondisaun no kontrolu tuir lei.
Jornalista: Nelson de Sousa
Editora: Maria Auxiliadora
