Komisaun A solisita ba Governu garante implementasaun lei sira ne’ebé aprova ona
DILI, 12 Outubru 2026 (TATOLI)-Prezidente Komisaun A ne’ebé trata Asuntu Konstitusionál no Justisa, Natalino dos Santos, solisita ba Governu atu prepara dekretu-lei no diploma legásl sira ne’ebé nesesáriu hodi garante implementasaun lei sira ne’ebé Parlamentu Nasionál aprova ona no tama ona iha vigór.
Nia husu ba Ezekutivu atu fó atensaun ba lei sira ne’ebé promulga ona, tanba maski iha kazu balun Governu rasik husu atu trata lei sira ne’e ho urjénsia, maibé to’o agora seidauk iha regulamentu implementasaun ne’ebé nesesáriu.
“Komisaun iha lista boot ida kona-ba lei sira ne’ebé promulga ona, maibé iha implementasaun seidauk. Ezemplu, Lei númeru 9/2026, loron 20 Jullu, kona-ba Rejime Jurídiku Ensinu Aprendizajen Prátika Arte Marsiál. Lei ne’e aprova tiha ona, maibé ninia prazu implementasaun dekretu ne’e seidauk”, nia levanta liuhusi reuniaun plenária Parlamentu, ohin.
Aleinde ne’e, Lei númeru 9/2025, loron 28 Dezembru, sobre Kódigu Rekuperasaun Insolvénsia, mós to’o agora seidauk implementa tanba seidauk iha estrutura ka mekanizmu insolvénsia ne’ebé nesesáriu.
Nia esplika katak iha lei balun ne’ebé prazu atu implementa ramata ona, maibé to’o agora Governu seidauk haree nia implementasaun. “Komisaun foti inisitiva, iha devér fiskaliza lei sira ne’e. Iha tempu badak sei haruka karta ida ba Governu hodi toma konsiderasaun. Nune’e, orienta membru Governu tutela mai Parlamentu”, nia afirma.
Deputadu ne’e husu ba Vise-Ministru Asuntu Parlamentár, Adérito Hugo, atu lori asuntu ne’e ba diskusaun Konsellu Ministru.
Hatán ba preokupasaun ne’e, Adérito Hugo, rejista lamentasaun Komisaun A nian no hatete katak nia aprezenta ona observasaun hirak ne’e atu alerta nafatin membru Governu tutela kona-ba nesesidade atu kumpe obrigasaun implementasaun lei sira.
Nia mós esplika katak iha períodu tranzisaun atu prepara norma sira, inklui dekretu-lei no diploma ministeriál, ne’ebé nesesáriu hodi asegura implementasaun lei sira ne’ebé aprova ona.
Kona-ba Lei Prátika Arte Marsiál, Komisaun Reguladora Arte Marsiál (KRAM), hamutuk ho ministériu relevante sira, kontinua akompaña prosesu tranzisaun ne’e, tanba entrega efetiva ba estrutura foun iha Janeiru tinan oin.
Tuir Adérito, daudaun autoridade relevante sira kontinua hala’o atividade sosializasaun no preparasaun ba diploma legál sira atu kompleta iha prosesu implementasaun lei ne’e.
Notísia relevante: Komisaun G husu sosializa Rejime Jurídiku ba Ensinu, Aprendizajen no Prátika Arte Marsiál
Jornalista: Nelson de Sousa
Editora: Maria Auxiliadora
