Laiha jestaun ba Otél Oé-Upun, PA RAEOA posibilidade hasai kompañia Seagull-Resort
OEKUSI, 12 Outubru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu, sei atribui karta xamada atensaun ba kompañia internasionál Seagull-Resort husi nasaun Malázia, tanba laiha jestaun no atividade investimentu iha otél Oé-Upun, ne’ebé antes ne’e selebra ona kontratu ho Autoridade RAEOA hodi utiliza durante tinan-50.
Notísia relevante:Posibilidade, Empreza estranjeira sei loke jogu online durante tinan-50 iha Oekusi
Régio da Cruz afirma katak, nu’udar Prezidente Autoridade, respeita kompromisu ba funsionamentu no jestaun ba otél Oé-Upun, maibé tenke obedese ba enkudramentu legál sira ba asuntu investimentu.
“Mandatu autoridade anteriór, uluk konsege selebra akordu ba otél Oé-Upun, ha’u mós hetan ona paresér legál husi jurídiku advogadu sira katak, ita-nia otél Oé-Upun abandonadu, kontratu Autoridade RAEOA sesante asina ona ba tinan-50, entaun ita respeita nafatin kompromisu parte rua ho parsériu estratéjiku, maibé uza sala kontratu ne’e ba scamin jogu online, ne’e labele,” nia hateten iha Oekusi, ohin.
Notísia relevante:Kazu otél Oé-Upun, arguidu na’in-neen kontinua detein iha sela detensaun kalan ida
Régio da Cruz informa, bainhira Governu hapara atividdae scamin ne’e, atividade sira kontinua paradu to’o ohin loron, tanba Autoridade RAEOA atuál espera, Governu Sentrál mak iha kompeténsia tanba lei númeru 3/2014 ba kriasaun estatutu RAEOA la prevee kompeténsia ba Ministériu Interór liliu defeza, seguransa ba asuntu ne’e.
“Maibé otél Oé-Upun, ami lakohi haree sai abandonadu, tanba agora parsériu sira la halo ona jestaun ba otél ne’e, bainhira ami simu mandatu to’o ohin loron parsériu laiha koordenasaun ruma ho Autoridade RAEOA atuál kona-ba atividade jestaun ba otél ne’e,” nia hateten.
Entaun, nia dehan, advise (konsellu) husi parte jurídiku sira katak, ita bele deside sei fó xamada ho tempu fulan hira tan, katak bele hato’o kompromisu ba autoridade kona-ba jestaun otél.
Maibé, haree fila-fali ba legalidade bazeia rezolusaun númeru 54, fulan-Outubru tinan-2025, kona-ba hapara scamin atividade iha otél ne’e, envolve mós kompañia no prezudikadu ba aktu ne’e.
“Entaun sei RAEOA kontinua renova selebra kooperasaun ho kompañia, signifika ami koopera ho ema ida-ne’ebé tuir lei, problematiku. Tan ne’e Autoridade sei hato’o karta ida ba Governu kona-ba pozisaun ne’e ho obrigasaun, ida katak ami lakohi investimentu ne’ebé halo ona maibé abandonadu, tanba kooperasaun ho parsériu ida-ne’ebé la obedese saida maka ita halo, ha’u hanoin to’o tempu atu haree asuntu ne’e hodi hadi’a di’akliu tan,” nia hateten
Notísia relevante:PSIK ho SNI monta ona liña polisiál ba eskritóriu rua iha otél Oé-Upun
Jornalista: Abílio Elo Nini
Editór: Rafael Ximenes de A. Belo
