MKI organiza Dili International Trade Expo ba faze daruak iha Novembru

DILI, 12 Outubru 2026 (TATOLI) – Ministériu Komérsiu no Indústri (MKI) planeia ona atu realiza Dili Internationál Trade Expo (DITE) faze daruak nian iha fulan-Novembru 2026.

Diretór-Jerál Komérsiu MKI, Elias de Jesus, informa katak atividade ne’e sei hala’o iha Sentru Konvesaun Dili (CCD, sigla portugés), durante loron tolu, hahú iha 15 to’o 18 Outubru 2026 ho tema “Thinking Globally, Building Globally, and Trading Internationally”.

Razaun hodi eskolla tema ida-ne’e mak tanba Timor-Leste integra ona ekonomia rejionál no globál, nune’e presiza adota hanoin no estratéjia ne’ebé orienta ba merkadu globál. Iha kontestu ida-ne’e, setór privadu, liuliu mikro, pekena, no médiu empreza bele hetan oporunidade no asesu bá merkadu internasionál.

“Orsamentu ne’ebé ita aloka ba atividade ne’e hamutuk rihun $300. Espera ho orsamentu ida-ne’e ita bele organiza eventu ne’ebé kompriensivu tebes atu promove ita-nia mikro, pekena, no médiu empreza sira-nia produtu ba merkadu internasionál”, Elias de Jesus hatete ba Tatoli, ohin.

Kona-ba preparasaun ba atividade, Ministru Komérsiu no Indústria, Filipus Nino Pereira, hasai ofisialmente despaxu atu ekipa prepara no organiza atividade ne’e.

Tuir nia, preparativu sira daudaun kontinua hela, no eventu ne’e sei partisipa mós husi setór privadu sira membru nasaun ASEAN.

“Obetivu DITE ne’e atu fasilita setór privadu nasionál no setór privadu sira husi membru-Estadu ASEAN. Daudaun ami koordena ho Event Organizer mak halo komunikasaun direta ho setór privadu sira iha nasaun membru ASEAN nian. To’o agora ami hetan ona konfirmasaun setór privadu liu ona 100 mak partisipa iha eventu ne’e”, nia adianta.

DITE ba tinan ida-ne’e, inklui atividade sira ne’ebé la’ós de’it promove produtu sira, maibé realiza mós ASEAN Trade Forum, ne’ebé sei konvida mós setór privadu sira husi nasaun membru ASEAN partilla sira-nia esperiénsia no bele haree oportunidade investimentu iha Timor-Leste.

Aleinde ne’e, sei iha mós atividade hanesan feira ne’ebé hatudu produtu lokál sira ne’ebé mai husi mikro, pekena, no médiu empreza Timor-Leste nian hanesan tinan kotuk atu promove produtu liuhusi espozisaun.

“Tinan kotuk ita prepara kuota 250, ne’ebé maioria ita-nia mikro, pekena, no médiu empreza mak prienxe. Ami alista ona grupu liu 150 ne’ebé preparadu atu partisipa iha expo ida-ne’e. MKI sei serbisu hamutuk ho Sekretaria Estadu Kooperativa no Ministériu Agrikultura, Pekuária, Peska no Floresta, nune’e bele fornese informasaun relasiona ho grupu ka mikro pekena, médiu, no empreza durante sira-nia atividade hetan apoiu”, nia dehan.

Relasiona ho akomodansaun iha tinan ne’e, setór privadu sira husi rai-li’ur ne’ebé atu partisipa sei selu rasik (Self-funding), tanba sira ne’e empreza boot ne’ebé hakarak haree oportunidade investimentu iha Timór no posibilidade serbisu hamutuk ho setór privadu nasionál.

“Tanba nee mak ita foku liu oinsá mobiliza ita-nia grupu no produtu atu hatudu ba sira katak ami mak ne’e, maski kuatidade ki’ik, maibé iha kualidade”, nia afirma.

Produtu sira ne’ebé setór privadu sira sei prepara iha expo tinan ne’e mak hanesan kafé, ai-kameli no seluk tan.

Notísia relevante: DITE 2025 fó oportunidade promove produtu Timór bá mundu

Jornalista: Arminda Fonseca 

Editora: Maria Auxiliadora