Reabilitasaun kanál irrigasaun Maliana I ramata
BOBONARU,12 Outubru 2026 (TATOLI)-Empreza Internasionál PT Minarta konklui ona reabilitasaun kanál irrigasaun Maliana I no iha tempu badak sei fornse bee ba área agrikultura iha suku Lahomea, Raifun, Ritabou, Odomau no Holsa.
Administradór Postu Administrativu Maliana, munisípiu Bobonaru, Augusto Caetano, dehan serbizu fíziku finaliza iha semana kotuk no iha kuarta-feira liubá Autoridade Postu Administrativu Maliana mós organiza agrikultór no asosiasaun agrikultór sira halo limpeza jerál hodi hasai fo’er, rai-henek no tahu iha kanál irrigasaun.
“Loloos ne’e iha sesta ne’e loke bee mai ona, maibé ami koko ba bee sai fali iha fatin ne’ebé cor ba, entaun sei taka filafali, hadi’a no kontinua suru hamoos hotu ona, ne’ebé hein de’it ohin halo kultura para loron ida ka rua tan bele hatama ona bee mai kanál irrigasaun laran para ita bele uza”, nia informa ohin.
Administradór ne’e salienta katak dadaun povu Maliana halerik hela bee-moos, tanba kauza husi bailoro naruk no prosesu reabilitasaun irrigasaun Maliana I.
“Povu Maliana hakilar duni ba bee tanba bee-posu sira ne’e maran, bee-matan Mugis de’it mós maran hotu tanba bee la mai, bee-matan Ai-Buchi Boro-matan mak sa’e mai liu kanál irrigasaun Maliana I hodi komunidade kee bee-posu hetan”, nia dehan.
Bainhira distribuisaun bee ba irrigasaun Maliana funsiona normál, Autoridade Postu Maliana husu ba agrikultór sira atu aproveita kedas halo atividade ortikultura hodi prepara hasoru El Niño.
“Époka daruak nia ita la biban ona, maibé ita bele kuda modo, ai-manas, tomate sira ne’e. Ita bele halo provizoriu hodi hein udan tau mai, máss tuir meteorolojia, tinan ne’e afeta bailoro naruk to’o marsu no abríl tinan oin, maibé ita haree to’ok, se bele labele husik rai ne’e mamuk. Ita bele halo netik buat ruma hodi hein bailoro naruk ne’ebé sei afeta ba ita”, nia rekomenda.
Iha sorin seluk, agrikultór Josefina Lopes promete sei aproveita didi’ak bee hodi reativa atividade agríkola no ortikultura.
Nia fiar katak funsionamentu irrigasaun Maliana I sei hamori fali bee-matan Mugis, Raeboanan no posu sira seluk.
” Ami agora araska loos be’e, hotu-hotu bá kuru no haris, fase-ropa iha mota Bulobu, tanba agora ne’e bee husik hotu bá mota, más dehan aban ou bainrua atu loke ona. Ami sei kud modo, ai-manas halo buat oioin tanba durante ne’e ami para la halo ida”, nia dehan.
Enkuantu irrigasaun Maliana I reabilita dahuluk husi Ajénsia Kooperasaun Internasionál Japaun (JICA) entre tinan 2008 no 2009, hanesan parte husi apoiu povu japonés nudar sinál amizade no kooperasaun entre nasaun rua.
Tuir dadus, irrigasaun ne’e fornese bee ba natar hamutuk ektare 1.050-resin pertense suku Lahomea, Raifun, Ritabou no Odomau.
Notísia relevante: Autoridade Maliana hasai sirkulár suspende atividade agríkola iha irrigasaun Maliana I
Jornalista: Sergio da Cruz
Editora: Maria Auxiliadora
