SSM Vikeke rejeita alegasaun deputada PN kona-ba utiliza ambulánsia ba atividade partidária
VIKEKE, 12 Outubru 2026 (TATOLI)–Diretór Servisu Saúde Munisípiu (SSM) Vikeke, Aljaksono S. Maia, rejeita alegasaun Deputada Bankada FRETILIN, Marquita Soares, iha Parlamentu Nasionál (PN), ne’ebé dehan ambulánsia multifunsaun tula diretór ida husi Díli mai Vikeke hodi partisipa iha atividade partidária.
Aljaksono dehan deputada nia deklarasaun iha plenária iha loron 19 Setembru 2026, la tuir realidade, tanba,tuir nia katak la iha ambulánsia multifunsaun ida mak sai husi Munisípiu Vikeke ba Dili hodi tula ema mai partisipa iha atividade partidária.
“Deklarasaun Deputada Marquita Soares nian ne’ebé hato’o iha plenária Parlamentu Nasionál kona-ba ambulánsia multifunsaun husi Postu Administrativu Uatukarbau bá Dili atu tula diretór ida mai Vikeke hodi partisipa iha atividade partidária ne’e laloos. Iha momentu ne’ebá, laiha ambulánsia ida mak sai husi Vikeke bá Dili ho objetivu ne’e,” Aljaksono hateten ba TATOLI iha SSM Vikeke, Segunda ne’e.
Nia esplika katak bainhira ambulánsia presiza halo viajen bá li’ur husi munisípiu, tenke hetan autorizasaun uluk no kumpre prosedimentu administrativu, inklui aprezentasaun karta autorizasaun.
Aljaksono afirma katak SSM Vikeke utiliza ambulánsia multifunsaun sira atu atende pasiente no transporta ema moras ba fasilidade saúde, liuliu iha situasaun emerjénsia, la’ós atu fasilita atividade ne’ebé laiha relasaun ho servisu saúde.
“Ha’u hakarak klarifika ba públiku katak ami uza ambulánsia multifunsaun sira ba atendimentu pasiente. Nu’udár reprezentante Governu, ha’u konsidera patrimóniu Estadu tenke uza tuir nia regra. Ha’u rasik la tolera se iha ema uza patrimóniu Estadu ba atividade seluk ne’ebé laiha relasaun ho servisu públiku,” nia afirma.
Diretór SSM Vikeke ne’e mós sujere deputadu sira iha PN atu halo fiskalizasaun direta iha terrenu molok hato’o alegasaun kona-ba servisu públiku, hodi asegura katak informasaun ne’ebé aprezenta iha Parlamentu bazeia ba evidénsia.
“Ha’u sujere deputadu sira atu mai halo fiskalizasaun direta iha terrenu molok hato’o asuntu sira iha Parlamentu. Fiskalizasaun importante atu asegura informasaun ne’ebé aprezenta iha públiku bazeia ba evidénsia ne’ebé loos, la’ós de’it ko’alia husi Parlamentu,” nia tenik.
Nia hatutan katak SSM Vikeke iha ambulánsia multifunsaun hamutuk unidade neen (6), ne’ebé distribui ba postu administrativu lima, hanesan Lakluta, Vikeke Vila, Uatulari, Ossú no Uatukarbau. Unidade ida mak hela iha SSM Vikeke atu apoia transferénsia pasiente sira bainhira iha nesesidade emerjénsia.
“Ambulánsia multifunsaun neen ne’ebé Governu aloka ba Vikeke distribui ba postu administrativu lima, no unidade ida hela iha SSM Vikeke atu fó apoiu bainhira presiza. Se ambulánsia ida avaria, ami bele organiza apoiu husi unidade seluk. Ba kondisaun atuál, ambulánsia multifunsaun sira-ne’e hotu iha kondisaun di’ak,” nia esplika.
Konteksu
Iha 21 Maiu 2026, TATOLI relata katak SSM Vikeke klarifika kona-ba kazu ida ne’ebé komunidade Ulusu, Postu Administrativu Uatulari, transporta pasiente ba fasilidade saúde tanba ambulánsia multifunsaun iha área ne’e lori ba Díli atu halo manutensaun. Bele lee notísia kompleta iha: SSM Vikeke klarifika abitante Ulusu ko’us pasiente bá fasilidade saúde.
Iha 23 Jullu 2026, TATOLI mós relata katak Ministériu Saúde entrega ambulánsia multifunsaun ida ba Autoridade Munisípiu Vikeke atu apoia atendimentu saúde iha munisípiu. Lee informasaun kompleta iha: MS apoia ambulánsia multifunsaun bá SSM Vikeke.
Jornalista: Vitorino Lopes da Costa
Editór: Xisto Freitas da Piedade
