Tribunál julga kazu demisaun funsionáriu ida husi Timor GAP, E.P
DILI, 12 Outubru 2026 (TATOLI)–Tribunál iha Segunda ne’e, hahú halo julgamentu ba prosesu sivil liga ho kazu demisaun ne’ebé Dirijente Timor GAP halo hasoru nia funsionáriu ida ho inisiál BA iha tinan 2024.
Iha prosesu ne’e, autór ho inisiál BA enkuantu Timor GAP nu’udar reu. Iha Audiénsia julgamentu, Tribunál arola uluk sasin própria ne’ebé autór aprezenta iha prosesu sivil referida.
Iha sala julgamentu, sasin Arcansia Rozario da Cruz, hateten ba Tribunál katak nia serbisu iha Timor GAP, E.P hahú tinan 2021 nu’udar ofisiál iha Rekursu Umanu. Nia koñese autór BA nu’udar kolega serbisu. Nia rekoñese katak iha 17 Maiu nia mak manda mesajen ida ba BA liuhusi whatsApp, katak atu asina kontratu foun ba serbisu nian.
Nia dehan, momentu ne’ebá autór BA la tama serbisu tanba foti lisensa anuál, tanba autór nia ain kanek tuir foto ne’ebé momentu ne’ebá nia manda ba sasin. No faktus ne’e prova iha autus laran.
Tuir regulamentu iha Timor GAP, E.P normalmente kuandu funsionáriu ida atu lisensa ne’e tenke hetan aprovasaun husi nia supervizór, kuandu nia lisensa hela nia instituisaun presiza atu halo serbisu emerjénsia bele revoga lisensa.
Notísia relevante : Timor GAP no EPIC esplora kolaborasaun estratéjika ba dezenvolvimentu lojítistiku petróleu no gás
Nia dehan, ho situasaun ne’e momentu ne’ebá BA la konsege asina kontratu no kontratu ne’e rasik prepara husi Diretora Rekrusu Umanu Timor GAP, E.P Anita Soares. Momentu ne’ebá nia haree duni karta lisensa ne’ebé hetan aprovasaun husi autór BA nian superizór duni.
Sasin hateten katak, momentu ne’ebá nia mak ba fó kontratu ba autór BA iha surat-tahan kontratu ne’e hakerek mudansa kontratu ba BA.
Iha fatin hanesan, sasin Grigório do Rosário Pires, relata ba Tribunál katak hahú serbisu iha Timor GAP, E.P iha tinan 2017 nu’udar Asistente ba Unidade Carbon Capture and Storage (CCS).
Momentu ne’eba nia koñese BA nu’udar tékniku ida iha nia unidade no momentu ne’ebá nia (Grigório) sai supervizór ba BA.
Sasin hateten, autór BA durante sira serbisu hamutuk ho BA, nia nu’udar tékniku enjiñeiru ida ne’ebé profosionál no kumpre ba orientasaun no serbisu sira.
Momentu ne’ebá tanba haree ba BA nia serbisu, maibé momentu ida BA la tama serbisu mós mesajen katak nia moras duni ain bubu no momentu ne’ebá iha koñesimentu.
Nia deklara, normalmente atu demite funsionáriu ida ka tékniku ida husi Timor GAP, E.P tuir esperiénsia, tenke bazeia ba avaliasaun, nu’udar suprevizaun Diretór sira tenke husi nia hanoin, maibé ba kazu demisaun BA, nia Diretór sira la envolve nia, tanba ne’e nia laiha koñesimentu.
Sasin ne’e hateten, desizaun ba demisaun BA ne’e altura ne’ebá desizaun husi Diretór Tomas Alo no Rekursu Umanu. BA só informa ba nia katak nia hetan demisaun ne’e mak hanesan supervizór nia (sasin) foin hatene katak BA hetan demisaun.
“Momentu ne’ebá ne’e ba kazu demisaun ba BA ne’ebé halo husi dirijente Timor GAP, E.P ne’e ha’u la envolve tanba sira la husu opiniaun no pareser ruma to’o hasai tiha BA. Tuir prosesu normál tanba atu hasai ema ne’e ha’u mak aprova nia lisensa no avaliasaun sira-nia (BA) halo sala ruma bolu ha’u ba esklarese hotu para ha’u mós mós fo pareser, maibé ba kazu BA nian ne’e la halo,” nia afirma.
Hafoin Tribunál arola tiha sasin propriu parte husi autór BA nian, Tribunál marka fali loron 23 Novembru 2026 tuku 09:30 hodi kontinua rona depoimentu sasin komún balun tan husi reu.
Prosesu ne’e prezide husi Juíz Koletivu João Ribeiro, António Fonseca no António Helder do Carmo no autór hetan asisténsia legál husi José Advogadu Privadu Teixera enkuantu reu Timor-GAP hetan asisténsia legál husi Advogada Privada na’in-rua.
Jornalista : Natalino Costa
Editora : Julia Chatarina
