Ahi-suar husi Indonézia, ME alerta ba estudante sira uza máskara
BOBONARU, 13 Outubru 2026 (TATOLI) – Ministériu Edukasaun (ME) husu ba inan-aman sira iha munisípiu Bobonaru atu prepara máskara ba labarik sira molok sai husi uma bá eskola, tanba ahi-suar husi inséndiu florestál iha Indonézia, hahú afeta ona área sira iha munisípiu ne’e.
Ministra Edukasaun, Dulce de Jesus Soares, hatete katak ahi-suar ne’ebé mai husi inséndiu florestál iha Papua Osidentál, Indonézia, no anin (mosaun Austrália) lori suar to’o Timor-Leste bele hamosu risku ba saúde, liuliu ba labarik, ferik-katuas no ema ne’ebé iha difikuldade atu dada iis.
“Tanba saida mak rai ne’e malahuk hanesan ne’e, ita agora problema ida iha ita-nia rai, tanba ahi han ai-laran iha Indonezia, nia suar ne’e mak agora mai to’o ita”, nia hateten iha intervensaun ba serimonia lasamentu konstrusaun edifísiu Edukasaun Pré-Eskolar, suku Soilesu, tersa-feira ne’e.
Ministra mós informa katak Ministériu Saúde (MS) antes ne’e hato’o ona mensajen ba públiku atu uza fali máskara, tanba ahi-suar bele afeta sistema respiratóriu no hamosu problema iha matan.
Nia hatutan katak iha Dili, labarik balun hasoru difikuldade atu dada iis no sente manas iha matan, ne’ebé bele liga ho kondisaun ahi-suar.
Tanba ne’e, nia husu inan-aman sira atu uza fali máskara ne’ebé sira simu durante pandemia Covid-19 karik sei iha ka buka iha fatin sira ne’ebé disponivel. “Fila uma agora tenke halo sira uza, tanba ha’u mós agora hamriik matan manas, tanba ahi-suar ne’e mai besik ona”, nia dehan.
Nia enfatiza katak inan-aman sira iha responsabilidade atu fó atensaun ba kondisaun saúde labarik sira, tanba ahi-suar sei kontinua afeta ambiente no bele hamosu risku ba saúde komunidade.
Enkarregadu edukasaun, Domingas de Jesus, dehan ahi-suar ne’e sira foin sente ohin dadeer pur-volta tuku 09h00.
Tanba ne’e hahú ohin ba oin sei prepara másakara ba oan sira, nune’e labele afeta ba sira-nia saúde.
“Horisehik laiha ida, ohin dadeer ne’e ami haree suar uituan de’it. Momentu loromatan sa’e maka’as manas loos ne’e mak ahi-suar mós barak tan de’it, haleu tomak kalohan foho sira ne’e, halo ita matan manas, mear. Ba oin ami mós sei uza fali máskara no labarik sira bá eskola mós ami sei halo sira uza para labele moras”, nia dehan.
Notísia relevante: Kualidade ár iha TL “extreme” bele fó impaktu ba saúde públika
Jornalista: Sergio da Cruz
Editora: Maria Auxiliadora
