Autoridade Suku Fatuhada husu Governu atualiza kartaun eleitorál biométriku
DILI, 13 Outubru 2026 (TATOLI) – Autoridade Suku Fatuhada, liuhusi Xefe Suku Marcelino dos Santos, husu Governu, liuhusi Sekretariadu Tékniku Administrasaun Eleitorál (STAE), atu fasilita prosesu atualizasaun kartaun eleitorál biométriku ba eleitór sira iha suku ne’e.
Marcelino dos Santos relata katak Suku Fatuhada iha populasaun hamutuk na’in-18.541, ho totál uma-kain hamutuk 3.372. Tuir estimativa, eleitór sira ne’ebé partisipa iha eleisaun anteriór hamutuk 8.500 to’o 9.500.
Nia prevee katak iha eleisaun prezidensiál no parlamentár iha tinan-2027 no 2028, númeru eleitor iha suku ne’e bele aumenta ba 11.000 to’o 12.000, tanba labarik sira ne’ebé seidauk iha idade atu vota iha tinan-2023 sei to’o ona idade eleitorál.
“Tanba ne’e, ami husu ba STAE atu lori ekipamentu atu halo produsaun no atualizasaun kartaun eleitorál biométriku ba suku, hodi fasilita asesu ba eleitór sira, tanba komunidade barak seidauk hatene oinsá atu troka kartaun eleitorál tuan ba kartaun biométriku,” Marcelino dos Santos hateten ba TATOLI iha sede Suku Fatuhada, iha tersa ne’e.
Notísia relevante:STAE distribui ekipamentu resensiamentu eleitorál no atualizasaun dadus biométriku
Autoridade lokál ne’e esplika katak servisu ne’e importante liuliu ba eleitór sira ne’ebé idade boot ona no ema ho defisiénsia, tanba sira hasoru difikuldade atu halo viajen dook hodi asesu servisu STAE iha nível munisipál ka nasionál.
“Eleitor barak mak katuas no ferik ona, no balun mós iha defisiénsia, nune’e sira labele lao dook atu to’o STAE nia eskritóriu, tantu iha nível nasionál no munisipál,” nia dehan.
Tuir líder komunitáriu ne’e, se STAE implementa servisu móvel no lori ekipamentu ba suku sira, medida ne’e bele ajuda komunidade atu atualiza dadus no kartaun eleitorál biométriku ho fasil.
Xefe Suku Fatuhada ne’e mos husu atu servisu móvel ne’e la limita de’it ba Suku Fatuhada, maibé estende ba suku sira hotu iha territóriu Timor-Leste, atu garante eleitór hotu-hotu hetan asesu hanesan ba servisu eleitorál.
Jornalista: Camilio de Sousa
Editór: Rafael Ximenes de A. Belo
