CLN Baukau menus estoke foos durante fulan neen
BAUKAU, 13 Outubru 2026 (TATOLI)–Sentru Lojístika Nasionál (CLN-sigla portugeza) nia Armajen Rejionál Baukau enfrenta falta estoke foos durante fulan neen ikus ne’e. Maski nune’e, CLN kontinua halo intervensaun ba komunidade bazeia ba pedidu ne’ebé simu husi lideransa komunitária.
Xefe Armajen Rejionál CLN Baukau, Agostinho Pereira da Silva, esplika katak falta estoke foos iha armajen rejionál la signifika katak intervensaun ba komunidade paradu ona, tanba pedidu sira ne’ebé simu sei haruka diretamente ba CLN nivel nasionál atu hetan resposta.
“Estoke laiha ona durante fulan neen, maibé bainhira ha’u halo pedidu, foos sei mai,” Agostinho Pereira da Silva hateten ba TATOLI iha ninia fatin servisu, Vila Nova, Baukau, Tersa ne’e.
Nia hatutan katak, durante tinan 2026, Armajen Rejionál CLN Baukau kontinua simu foos husi nivel nasionál no hala’o intervensaun ba komunidade iha Munisípiu Baukau, Vikeke no Lautein.
Tuir Agostinho, CLN mós kontinua distribui foos bazeia ba pedidu husi komunidade, inklui iha Postu Administrativu Baguia no Laga, no suku sira iha Postu Administrativu Baukau Vila.
“Ita kontinua halo intervensaun. Foin lalais ne’e, ita halo ona intervensaun iha Baukau Vila, iha fatin oioin to’o Buruma,” nia akresenta.
Agostinho informa katak Armajen Rejionál CLN Baukau iha hare-kulit hamutuk tonelada 60. Enkuantu, estoke iha armajen CLN Tíbar no Natarbora sei disponivel atu apoia intervensaun bainhira rejiaun leste presiza.
Durante intervensaun ba komunidade, CLN fa’an foos ho folin US$4,50 ba kada saku ne’ebé nia todan kilógrama sanulu (10), no US$9 ba kilógrama 20.
Kontekstu
CLN iha responsabilidade atu asegura disponibilidade produtu alimentár no halo intervensaun iha merkadu bainhira presiza, hodi ajuda komunidade sira hetan asesu ba ai-han ho folin asesível. Iha notísia ida publika iha 29 Setembru 2026, TATOLI relata katak CLN sosa ona hare-kulit tonelada 210 husi agrikultór sira iha Munisípiu Kovalima. Hare-kulit ne’e sei prosesu atu sai foos, nu’udár parte husi esforsu atu asegura fornesimentu produtu alimentár iha rai laran. Lee notísia relevante: CLN sosa ona hare-kulit tonelada 210 husi agrikultór Kovalima.
Jornalista: Natalino Belo
Editór: Xisto Freitas da Piedade
