Empregadór Nova Zelandia sei rekruta traballadór timoroan na’in-95
DILI, 13 Outubru 2026 (TATOLI)—Sekretáriu Estadu Formasaun Profisionál no Empregu (SEFOPE), Rogério Araújo Mendonça, hala’o reuniaun ho empregadór foun ne’en (6) husi Nova Zelandia no empregadór tuan ida (1), ne’ebé iha intensaun hakarak mellora no sei halo rekrutamentu ba traballadór timoroan na’in-95 ba servisu iha área ortikultura nian.
Notísia Relevante: Kandidatu traballadór 2.345 tuir teste médiku atu ba servisu iha Austrália-Japaun-Nova Zelandia
“Inisiativa empregadór sira-ne’e tanba sira fona informasaun husi empregadór tuan sira-ne’ebé antes ne’e halo ona rekrutamentu ba ita-nia traballadór timoroan sira, nune’e sira mós hakarak investe hotu ita-nia rekursu uma liuhusi programa RSE,” Sekretáriu Estadu Formasaun Profisionál no Empregu, Rogério Araújo Mendonça, relata ba jornalista sira iha ninia edifísiu Kaikoli, ohin.
Nia dehan, prosesu rekrutamentu sei hahú husi kuarta (14 Outubru) aban no sei fó oportunidade ba kandidatu sira-ne’ebé naran tama ona iha sistema RSE nian.
“Traballadór timoroan ne’ebé servisu iha Nova Zelándia daudaun ne’e hamutuk na’in-30. Iha fulan-Novembru agora sei haruka tan traballadór na’in-95 bá servisu iha Nova Zelándia iha área ortikultura nian no fiar katak remata fulan-Novembru ita bele iha tan kandidatu na’in-95 ba etapa tuir mai,” nia dehan.
Prosesu rekrutamentu nian nafatin tuir prosedimentu baibain ne’ebé iha no iha biban ne’e sei fó oportunidade mós ba feto hodi compete, tanba iha Nova Zelándia sira mós promove tebes feto sira.
“Loos dunia, prosesu rekrutamentu antes ne’e iha traballadór mane de’it mak ba servisu iha ne’ebá, maibé agora feto mós bele ba servisu hotu,” nia hateten.
Tanba ne’e, nia husu ba kandidatu sira atu prepara-an didi’ak no saúde atu bele tuir hotu teste ida-ne’e hodi hadi’a sira-nia moris no hamenus dezempregu iha nasaun ida-ne’e.
Enkuantu empregadór hirak-ne’ebé ohin konvoka enkontru ho SEFOPE mak hanesan, Mr Apple, Trevelyan’s, East Pack, Birdhurst, Thornhill, MBIE no Seasonal Solution Coperative.
Notísia Relevante: Kandidatu traballadór 2.345 tuir teste médiku atu ba servisu iha Austrália-Japaun-Nova Zelandia
Jornalista : Alexandra da Costa
Editór : Cancio Ximenes
