Folin simentu iha Maliana seidauk estavel, maski tun ona ba $5,75 kada saku
BOBONARU, 13 Outubru 2026 (TATOLI) – Folin simentu iha loja sira iha Maliana, munisípiu Bobonaru, seidauk etavel, maski hahú husi semana kotuk to’o agora folin tun ona husi $6,50 ba $5,75 kada saku.
Tuir observasaun jornalista Tatoli, iha loron tersa-feira, 13 Outubru, hatudu katak folin simentu varia tuir marka no loja, enkuantu marka balun menus ka stock hotu. Situasaun ne’e halo konsumidór sira kontinua preokupa kona-ba osibilidade folin sa’e no fó impaktu ba konstrusaun uma.
Iha loja Alexandro, simentu marka Tonasa fa’an ho folin $5,75 kada saku, maibé marka Conch laiha stock. Iha loja Yngfa, Tonasa fa’an $5,75 no Conch $5,50. Iha loja Moris Kmanek, Tonasa fa’an ho presu $5,75, maibé Conch laiha stock.
Iha loja Rizky, folin Tonasa mak $5,90 no Cons $6,00 kada sadu. Enkuantu iha loja Fachai Tonasa fa’an ho $5,75, maibé Conch laiha stock.
Kompradora Felicidade Moniz hatete nia kontente ho mudansa presu ne’e, maski seidauk fila ba presu normál $4.50.
“Agora tun ona no ami sente di’ak uitoan. Maski folin seidauk estavel hanesan uluk, nia uitoan ami mai hola kedas, tanba ami halo hela uma. Se folin sa’e fali karik, ita sosa labele, uma mós ita labele kontinua tanba kbiit la to’o”, nia informa ba Tatoli, iha Rotunda Maliana, ohin.
Komunidade Leopoldo Lopes mós rekomenda ba Governu atu kontrola presu materiál konstrusaun iha merkadu nasionál, nune’e bele normaliza.
“Se folin simentu nafatin karun, ami povu ki’ik labele harii ami-nia uma tanba forsa finanseira la to’o. Folin presiza estavel no razoavel atu ami mós bele harii mahon ba oan sira, liuliu iha tempu bailoro hanesan agora”, nia dehan.
Tuir observasaun jornalista Tatoli iha terrenu, simentu marka Conch maioria nia stock hotu iha loja sira, enkuantu marka Tonasa stock sufisiente atu responde ba nesesidade kompradór sira.
Notísia relevante: Folin simentu iha Maliana sa’e ba $6.50 kada saku
Jornalista: Sergio da Cruz
Editora: Maria Auxiliadora
