Folin simentu iha Maliana sa’e ba $6.50 kada saku
BOBONARU, 22 Setembru 2026 (TATOLI) – Loja sira ne’ebé fa’an sasán konstrusaun nian iha kapitál Maliana, munisípiu Bobonaru, hasa’e presu simentu Tonasa husi $4.50 no $4.75 ba $6.00 no $6.50 kada saku.
Tuir informasaun ne’ebé Tatoli rekolla iha terrenu, mudansa ne’e akontese tanba stock menus iha fornesedór nasionál sira no mudansa ba kustu transporte no taxa nian.
Presu atuál iha loron tersa-feira, 22 Setembru, ne’e iha loja Facay simentu Tonasa $6.50, Conch $6.00, iha loja Rizky Conch $6.00, iha Yangfa Tonasa no Conch $6.00 hotu, enkuantu loja Moris Kmanek Conch $5.75 no Tonasa $6.50.
Kompradór Domingos Bragança husu ba Governu atu buka meiu hodi solusiona problema referidu, tanba mudansa presu simentu afeta tebes ba sira.
“Ami la hatene presu sa’e ne’e tanba saida. Loja-na’in dehan Simentu iha Dili mak laiha, más ida ne’e tebes ka la’e? Governu tenke kontrola, tanba agora povu maioria preokupa. Iha tempu bailoro hanesan sira atu halo uma mós la di’ak, balun uma halo hela, simentu laiha atu mai sosa, komu presu sa’e sira la konsege sosa. Depois afeta mós ba projetu sira agora implementa ne’e, kompañia sira mós lakohi lakon, dalaruma sira la sosa, entaun implika ba obra”, nia informa ba Tatoli, iha merkadu Maliana, ohin.
Aleinde ne’e komunidade Maliana, Bonifácio de Jesus, rekomenda ba parte kompetente atu kontrola empreza distribuidora ne’ebé durante ne’e distribui simentu ba merkadu nasionál no munisípiu.
Notísia relevante: MPIE no CCI-TL diskute projetu husi kontratu públiku no presu iha merkadu
“Presu agora ne’e sa’e maka’as liu. Ida-ne’e loos ka manipula, ita tenke hatene, tanba saida, se la’e ita-nia povu ki’ik sai vítima beibeik. La kle’ur mina mak folin sa’e, agora simentu fali ona. Simentu sa’e ne’e stock foun ka tuan ou keta rona dehan iha nasionál sa’e be stock tuan mós sa’e hotu. Ida-ne’e la justu ida”, nia lamenta.
Tuir observasaun jornalista Tatoli iha terrenu, maski presu simentu sa’e, maibé komunidade sira nafatin sosa iha loja sira tanba nesesidade urjente.
Notísia relevante: Xanana husu setór privadu labele halo manobra hasa’e presu materiál konstrusaun
Jornalista: Sergio da Cruz
Editora: Maria Auxiliadora
