Monumentu Masakre Maquelab iha Taiboko modernizadu ona

OEKUSI, 13 Outubru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA) moderniza ona monumentu Masakre Maquelab -‘monumentu sangrante no istóriku’ tanba kauza ba ukun rasik aan, ne’ebé lokaliza iha aldeia Maquelab suku Taiboko sub-rejiaun Pante Makasar.

Prezidente Autoridade RAEOA, Régio da Cruz Salu, konsidera fatin ne’e istóriku tanba maluk maluk Atoni-oan na’in-13 mate iha fatin ne’e, tanba ne’e presiza moderniza ba futuru bele sai mós fatin turizmu ida.

“Ne’e kompromisu pesoál husi oan veteranu sira, la’ós projetu husi Governu, maibé nu’udar asaun karidade ida, atu banati jestu lidér nasionál sira katak, servisu ba karidade, entaun inisiátiva ne’e ita funsionáriu husi lojístika sira iha Gabinete RAEOA fulan-fulan simu osan mak kontribui inklui hetan kontribuisaun husi parsériu balu hodi hadi’a monumentu ne’e,” nia hateten ba jornalista sira iha Oekusi, ohin.

Nia esplika, verba ba reabilitasaun ne’e la to’o rihun $3, tanba tuir observasaun públiku inklui Autoridade RAEOA, fatin ne’e presiza moderniza tanba martír sira-nia fatin tenke dignu.

“Uluk raan turuk ba rai ne’e hodi hetan ukun rasik an, sei ita haree fatin ne’e  animál mak nakonu, foer tupuk iha monumentu, entaun nu’udar sidadaun ida mai husi jerasaun patriota sira, ita lakoi haree fatin ne’e sai imajén ladiák iha públiku, ida-ne’e mak inisiátiva tau hadi’a tanba antes ne’e ha’u mak promete atu hadi’a, no ohin ita hahú hadi’a ona,” nia hateten.

Notísia relevante:Autoridade RAEOA kompromete moderniza monumentu Masakre Maquelab

Xefe Aldeia Maquelab, Tarcizio Sonet, hato’o agradese, tanba fatin ne’e merese atu moderniza, nu’udar fatin istória ba martir sira-ne’ebé mate iha tinan 1999.

“Ami kontente, Governu hadi’a ona, tanba fatin ne’e uluk ita-nia maun alin na’in-13 mate; milísia sira mak oho iha fatin ne’e. Entaun, sira-nia monumentu presiza halo lutu hale’u, nune’e ema no animál labele tama sai, bainhira ita atu sunu lilin karik, depois taka fali, fatin ne’e ne’e iha merkadu, entaun ita haree foer nakonu, maib’e agora hadi’a ona, ha’u hanoin ba futuru ita sei haree fatin ne’e sai di’akliu tan,” nia hateten.

Entretantu, martir na’in-13 ne’ebé mate iha loron 20 Outubru 1999 mak hanesan, Yohanes Talias, Domingos Fone, Mateus Ton, Gradus Elo, Marculino Fone, António Beno, Luís Palat, Ernesto Elo, Justilio da Costa, Paulos Quelo, Paulos Cusi, Domingos Quelo no Francisco Taek

Jornalista: Abílio Elo Nini

Editór: Rafael Ximenes de A. Belo