Provizóriamente, aplikante na’in-130 husi munisípiu lima aptu iha prova kulturál
DILI, 13 Outubru 2026 (TATOLI)—Komisaun Rekrutamentu rejista dadus provizóriu, iha aplikante 130 husi munisípiu lima aptu iha prova kulturál, hahú husi loron abertura ba vaga membru Polísia Nasionál Timor-Leste (PNTL) 2026.
Prezidente Komisaun Rekrutamentu kandidatu membru PNTL 2026, Komisáriu Asistente Polísia José Soares, informa, iha aplikante 11.391 mak partisipa iha prova kulturál iha loron 08 Outubru, husi loron ne’e tama ba loron dahaat, iha aplikante husi munisípiu lima hanesan Aileu, Ainaru, Ataúru, Baukau no Bobonaru mak ramata ona teste kulturál.
“Iha kandidatu (aplikante) hamutuk na’in-2.550 mak tuir prova kulturál, husi kandidatu sira ne’e, ne’ebé mak pasa iha teste prova kulturál iha ema na’in-130. Sira ne’ebé mak la pasa iha ema 2.420, ne’e rezultadu provizóriu iha loron-haat nia laran to’o ohin loron,” Komisáriu Polísia José Soares hato’o ba Jornalista sira iha sala Komisaun Funsaun Públika, Matadoru, Tersa ne’e.
Notísia relevante : Aplikante 11.391 vaga membru PNTL hahú submete ba prova kulturál
Aplikante sira ne’ebé la pasa hamutuk 2.420 kompostu husi feto iha 591 no mane 1.429, sira ne’ebé mak pasa hamutuk 130, kompostu husi feto 26 no mane 104.
Nia dehan, rezutadu ne’e la priexe kouta ne’ebé molok ne’e Komisaun fó ba munisípiu sira.
“Provizóriu seidauk priense, maibé ita hatene munisípiu sira ne’ebé mak sai barometer ne’e mak kapitál Dili, ita sei haree sira no depoizde sira ezame hotu mak juri koletiva sei aprezenta ba Komandante Jerál no Ministériu Interiór ho opsaun ne’ebé di’ak hodi Governu bele foti desizaun ba konkursu iha tinan ida-ne’e,” nia tenik.
Komisaun nota, durante loron haat ne’e teste la’o di’ak, maibé aplikante balun mak la kumpre oráriu, sira balun turma dahuluk sira mai fali iha daruak ne’e tuir diploma ne’e la autoriza tanba antes ne’e autoriza ba aplikante hotu atu mai sedu.
Komisáriu Asistente José hateten, iha teste kulturál ba kandatu sira ne’e la’o tuir regra sira tuir diploma ministeriál, sira mai tenke tuir estasaun lima, ida sira tenke tama husi entrada, rua sira tenke tama mai hodi bolu naran, tolu aplikante sira tenke haree naran iha sistema, dahaat sira tenke entrega sira-nia sasán ne’ebé sira lori, depois mai estasaun lima tama ba idaidak nia sala teste.
“Husi ida-ne’e balun ne’ebé mak mai atraza, kuandu nia atraza iha nia turnu minutu 15 ka minutu 20 ita bele fasilita, maibé liuhusi ida-ne’e ita la fasilita tanba diploma ministeriál ne’e hateten katak sira ne’ebé mai tarde ita la konsidera ou sai husi lista,” nia tenik.
Jornalista : Natalino Costa
Editora : Julia Chatarina
