SEPS apoia materiál rekuperasaun ba uma-kain 47 iha Maucatar
KOVALIMA, 13 Outubru 2026 (TATOLI) – Sekretaria Estadu Protesaun Sivil (SEPS) distribui materiál rekuperasaun ba vítima dezastre naturál uma-kain 47 iha Aldeia Ila, Suku Belekasak, Postu Administrativu Maucatar, Munisípiu Kovalima.
Biban ne’e, Sekretáriu Estadu Terra no Propriedade, Jaime Xavier Lopes, dehan apoia ne’e nu’udar parte husi responsabilidade Governu nian atu fó asisténsia emerjénsia no rekuperasaun ba sidadaun sira ne’ebé sofre impaktu husi dezastre naturál.
Asisténsia ne’e bazeia ba Dekretu-Lei Númeru 12/2020, ne’ebé regula obrigasaun Governu nian atu apoia vítima sira ne’ebé afeta husi dezastre naturál.
“Ita fó apoiu materiál rekuperasaun ba uma-kain 47, tanba Governu iha dever atu fó asisténsia emerjénsia no rekuperasaun ba vítima sira ne’ebé afetadu husi dezastre naturál,” nia dehan.
Nia mós husu komunidade atu evita konstrui uma iha área ne’ebé iha risku ba dezastre naturál, no konsidera atu muda ba fatin seguru hodi prevene risku no garante seguransa ba família sira.
Molok ne’e, iha 12 Outubru 2026, Prezidente Autoridade Protesaun Sivil (APC), Jesuíno dos Reis Carvalho, entrega materiál rekuperasaun ba xefe família 11, inklui uma-kain 10 husi Suku Ogues, Postu Administrativu Maucatar, no uma-kain ida husi Postu Administrativu Zumalai.
Notisia relevante:Vítima inséndiu iha Vila Nova hetan ona apoia emerjénsia
Jornalista: Celestina Teles
Editór: Florencio Miranda Ximenes
