Xefe Estadu husu Governu tau orsamentu espesiál atu prezerva no promove tais
DILI, 13 Outubru 2026 (TATOLI)–Prezidente Repúblika, José Ramos-Horta, husu Governu Konstitusionál da-sia (IX) presiza tau orsamentu espesiál ba grupu soru-na’in tais sira, atu prezerva identidade nasionál no kria kampu servisu ba joven sira.
Notísia Relevante: PN aprova votu kongratulasaun ba “tais” sai patrimóniu mundiál
“Ha’u hanoin, Governu tenke liuhusi instituisaun Estadu no Sekretária Estadu Arte no Kultura ho orsamentu boot ruma hanesan millaun ida ba grupu soru tais, atu nune’e inan sira bele hetan kompensasaun di’ak, hodi halo serbisu no joven feto sira mós bele hakruuk ba ida-ne’e,” Prezidente Repúblika hateten ba jornalista sira iha Palásiu Prezidensiál Nicolau Lobato, Bairru Pite, ohin.
Xefe Estadu hato’o parabéns ba Timor Aid no instituisaun parseiru sira hanesan Nasaun Unida, UN Women, UNDP, UNICEF, Embaixada Austrália no Embaixada Estadu Unidu Amérika, ne’ebé apoia programa no projetu kona-ba dezenvolvimentu merkadu ba tais Timor-Leste.
Nia dehan, liuhusi Ministériu Juventude no Desportu no Sekretária Estadu Arte no Kultura, iha tinan sira-nia laran ne’e, kada vés tais iha mundu koñese liután no konsege faan ba internasionál.
Nia subliña katak tenke kontinua hametin merkadu, tanba prodús tais la fasil no tais ida tenke halo iha semana ida-nia laran, entaun tasi ne’e la’ós baratu.
“Tais ho kualidade di’ak nia presu hahú husi $40 to’o $100 no $200, tanba ne’e todan tebes. Tanba ida-ne’e, Prezidente halo esforsu maka’as hodi halo promosaun nasionál no internasionál, no eventu Tais Forum ida-ne’e di’ak tebes atu kontinua halo sosializasaun,” nia hateten.
Horta mós kompara kualidade tais Timor-Leste ho NTT, Indonézia, no afirma katak ema iha NTT laiha kualidade tais hanesan Timor-Leste nian tanba tais Timor nia kualidade di’ak-liu.
Atu garante sustentabilidade, nia dehan, tenke haree ba matéria prima sira hanesan benang no tinta, oinsá bele prodús iha rai-laran, maibé labele muda mákina orijinál ne’ebé tradisionál. Ida-ne’e presiza orsamentu espesiál, tanba prezervasaun tais hanesan parte edukasaun, tradisaun no kriasaun empregu.
Nia husu atu tau orsamentu boot, tanba tradisaun ne’e mai husi dook. Karik laiha apoiu no tesi-na’in ferik sira balun la iha ona ka mate, tradisaun ne’e bele lakon liuliu iha tempu modernizasaun.
“Prinsípiu di’ak liú mak kontrolu no insentivu ba buat ne’ebé orijinál duni, atu bandu ema lori tais ne’ebé la orijinál tama merkadu. Hanesan ema halo iha Atambua, tais Atsabe no Bobonaro depois fa’an hanesan tais orijinál, ne’e ita tenke kontrola,” nia hateten.
Atu di’ak-liu, nia sujere, atu tau osan hodi apoia produsaun iha rai-laran no halo publisidade makaas liu, tanba kualidade tais Timor-Leste bele karun liu maibé turista sira no timoroan sira-ne’ebé iha osan hakarak sosa buat ne’ebé orijinál.
Jornalista : Hortêncio Sanchez
Editór : Cancio Ximenes
