Abitante Babulu lamenta EDTL tesi liña eletrisidade ne’ebé fornese enerjia ba bomba bee
VIKEKE, 14 Outubru 2026 (TATOLI)—Komunidade Suku Babulu, Postu Administrativu Uatulari, Munisípiu Vikeke, durante semana ida resin ona enfrenta difikuldade asesu ba bee-moos, hafoin ekipa Eletrisidade Timor-Leste, Empreza Públika (EDTL, E.P.) tesi liña eletrisidade ne’ebé fornese enerjia ba bomba distribuisaun bee.
Portavós komunidade Suku Babulu, Andre da Costa Tavares, lamenta desizaun EDTL nian ne’e tanba afeta asesu ba bee-moos ba komunidade, inklui instituisaun públika hanesan eskola no postu saúde.
“Ami, komunidade Suku Babulu, lamenta tebes desizaun EDTL nian tesi liña eletrisidade ne’ebé fornese enerjia ba bomba bee. Distribuisaun bee ba komunidade tomak depende ba bomba ne’e. Maibé, iha semana kotuk, tékniku EDTL sira tesi ona liña eletrisidade, nune’e durante semana ida resin ami labele asesu ba bee-moos,” Andre da Costa Tavares hateten ba jornalista sira liuhusi konferénsia imprensa iha Suku Babulu, Kuarta ne’e.
Nia esplika katak interrupsaun eletrisidade ne’e afeta diretamente distribuisaun bee ba komunidade no instituisaun públika sira iha suku ne’e.
Andre, hamutuk ho autoridade lokál, husu EDTL atu liga filafali liña eletrisidade ne’e lalais no fó esplikasaun kona-ba razaun ne’ebé lori ba desizaun atu tesi liña.
“Ami husu EDTL Munisípiu Vikeke atu liga filafali liña eletrisidade ne’e lalais, atu komunidade bele asesu hikas bee-moos. Ami mós husu EDTL nasionál atu investiga desizaun EDTL munisípiu nian no foti medida apropriada. Ami husu Governu atu haree problema ida-ne’e ho seriedade no urjénsia, tanba bee mak nesesidade fundamentál ba moris,” nia lamenta.
Nia enfatiza katak komunidade la’ós kontra instituisaun Estadu, maibé hakarak atu garante direitu komunidade nian atu asesu ba bee-moos.
Iha fatin hanesan, Xefe Suku Babulu, Mário Trindade, konfirma katak komunidade no instituisaun sira iha suku ne’e enfrenta difikuldade atu hetan bee hafoin EDTL tesi liña eletrisidade ne’ebé liga ba bomba distribuisaun bee.
Nia lamenta tanba ekipa tékniku EDTL sira mai tesi liña eletrisidade ne’e sein fó informasaun uluk ba autoridade suku.
“Ami sente triste tebes tanba ekipa EDTL sira mai tesi liña eletrisidade ne’e sein fó hatene uluk ba autoridade suku. Hahalok ne’e afeta komunidade nia moris loron-loron, liuliu iha tempu bailoron, bainhira asesu ba bee-moos sai difísil,” Mário Trindade tenik.
Nia hatutan katak, agora daudaun, komunidade balun tenke la’o ain besik kilómetru hitu atu kuru bee hodi responde ba nesesidade uma-laran.
Tanba ne’e, Mário husu EDTL no entidade relevante sira atu konsidera impaktu desizaun sira ba komunidade molok foti medida hanesan ne’e.
“Ha’u husu EDTL atu liga filafali liña eletrisidade ne’e atu rezolve problema bee-moos ne’ebé ami hasoru,” nia hato’o.
Sistema distribuisaun bee ne’e fó benefísiu ba komunidade Aldeia Ualu, ho uma-kain hamutuk 185 no populasaun besik ema 1.700. Sistema ne’e mós importante ba Ensinu Báziku Filiál (EBF) Kaikasa Bu’u no Postu Saúde Kaisa Bu’u.
EDTL: Liña eletrisidade seidauk rejistada
Hatán ba preokupasaun komunidade nian, Koordenadór EDTL, E.P. Munisípiu Vikeke, Eduardo Sarmento, esplika katak ekipa téknika tesi liña eletrisidade ne’e tanba liña refere seidauk rejista iha EDTL.
Nia dehan katak EDTL aviza ona parte ne’ebé uza liña eletrisidade ne’e atu halo rejistasaun, maibé to’o agora seidauk kumpre prosesu ne’e.
“Kona-ba liña eletrisidade ne’ebé ami tesi, razaun mak tanba liña ne’e seidauk rejistada. Antes ne’e, ami fó-hatene ona sira atu mai halo rejistasaun, maibé sira seidauk rejista. Tanba ne’e, ami foti desizaun tesi liña ne’e. Bainhira sira rejista ona iha EDTL Munisípiu Vikeke, ami sei liga filafali,” Eduardo Sarmento esplika.
Nia hatutan katak situasaun hanesan ne’e akontese mós iha Suku Vessoru, Postu Administrativu Uatulari. Iha kazu ne’e, EDTL liga filafali liña eletrisidade depoizde utilizadór sira kumpre prosesu rejistasaun.
Eduardo afirma katak komunidade Suku Babulu mós tenke halo rejistasaun molok EDTL bele liga filafali liña eletrisidade ne’e.
Konteksu
Problema asesu ba bee-moos iha Munisípiu Vikeke mós akontese iha komunidade seluk. Iha 26 Setembru 2026, TATOLI relata katak abitante aldeia tolu iha Suku Loi-Ulu, Postu Administrativu Uatukarbau, enfrenta falta bee-moos no tenke ba kuru bee iha bee-matan ho distánsia besik kilometru ida ka rua.
Notísia ne’e hatudu katak asesu ba bee-moos kontinua sai dezafiu ba komunidade balun iha Vikeke.
Lee notísia relevante: Abitante aldeia tolu iha Suku Loi-Ulu Vikeke enfrenta falta bee-moos – TATOLI
Jornalista: Vitorino Lopes da Costa
Editór: Xisto Freitas da Piedade
