Autoridade prevee rihun $146-resin hadi’a asesórie EDTL iha territóriu RAEOA

OEKUSI, 14 Outubru 2026 (TATOLI) – Autoridade Rejiaun Administrativa Espesiál Oekusi Ambeno (RAEOA), aloka verba rihun $146,444.00 husi Orsamentu Jerál Estadu (OJE) 2026 hodi halo manutensaun rotina ba liña distribuisaun Eletrisidade Timor-Leste (EDTL) nian iha territóriu Oekusi.

Pontu Fokál EDTL Oekusi, Antão Cabal, hateten, prosesu manutensaun ne’e sei hahú husi feeder 01 to’o feeder 05, kobre ba suku 20 no sub-rejiaun haat iha Oekusi.

“Manutensaun ne’eba ai-riin sira no asesórie liña distribuisaun ne’ebé afeta husi alargamentu estrada, durante ne’e ita observa ai-riin balu besik atu monu, entaun antes tempu udan ita tenke halo hadi’a, nune’e labele afeta ba avariasaun iha tempu udan,” nia hateten ba jornalista sira iha Oekusi, ohin.

Notísia relevante:Abitante Pássabe husu EDTL Oekusi hadi’a fiu eletrisidade

Pontu fokál ne’e afirma katak durante ne’e, komunidade sira iha área rurál, hato’o bebeik lamentasaun, tanba ai-riin balun hetan dezastre naturál inklui fiu (kabu), nune’e iha tinan ne’e komesa normaliza antes tempu udan.

Tanba ne’e, antes ne’e, Autoridade RAEOA liuhusi Diresaun Servisu Rejionál Obra Públika, tau prioridade hodi loke konkursu públiku, no oras ne’e iha ona rezultadu, kompañia manán-na’in, Taneseb Maesmat Unipesoál Lda, maka sei ezekuta servisu ida-ne’e, ho valór $146,444.00.

“Maibé agora seidauk ezekuta, tanba liuhusi selebrasaun kontratu definitivu ho Prezidente Autoridade RAEOA, ne’ebé sei akontese iha Outubru ne’e, Novembru sira bele hahú servisu ona,” nia hateten.

Antes ne’e, abitante sira iha aldeia Haemanu, suku Abani sub-rejiaun Pássabe, reprezenta husi lia-na’in Mauricio Elo,  rekomenda ba EDTL Oekusi, atu hadi’a fiu elétrika neʼebé monu kuaze tinan ida ona hamutuk poste haat  iha área Haemnanu, tanba bele fó risku ba movimentu ema no animál sira.

Notísia relevante:EDTL Oekusi notifika ona loja Ren Zhi ne’ebé okupa ai-riin elétrika iha espasu públiku

Dokumentu ofisiál, Ajénsia TATOLI,I.P asesu, iha loron 07 Outubru 2026 ne’e, Autoridade RAEOA liuhusi Diresaun Servisu Rejionál Aprovizionamentu fó sai ona rezultadu konkursu públiku, ho númeru 041/SRAP/RAEOA/-TL/VII/2026, empreza Taneseb Maesmat Unipesoál Lda, mak sei ezekuta ho valór rihun $146,444.00

Jornalista: Abílio Elo Nini

Editór: Rafael Ximenes de A. Belo