EDTL sei instala prepago to’o suku no aldeia sira iha RAEOA
OEKUSI, 14 Outubru 2026 (TATOLI) –Autoridade Rejiaun Administrativa Espesiál Oekusi Ambeno (RAEOA), aloka rihun $89,000.00 husi Orsamentu Jerál Estadu (OJE) 2026 hodi utiliza kompra prepago pulsa/Kwh three phose e single phose hodi halo instalasaun ba sub-rejiaun prepara ba sub-rejiaun sira to’o suku no aldeia.
Komisáriu Ezekutiva Servisu Koorporativu EDTL,EP, Júlio de Jesus Gonçalves, hateten, polítika ne’e, atu kumpre orientasaun husi husi Ministéru Obra Públika, ne’ebé antes ne’e, deskobre reseita no despeza husi EDTL Oekusi la balansu, hodi fó prejuízu ba Estadu.
“Ita tenke halo instalasaun kontadór ba komunidade sira, orientasaun husi MOP ami apoia no kumpre 100%, ita sei instala to’o suku no aldeia sira, tanba sentrál power-plant Sakato uza mina, entaun ita hotu tenki kontribui, pelu-menus ita hola netik pulsa, nune’e bele ajuda Estadu,” nia hateten iha Oekusi, ohin.
Notísia relevante:EDTL,E.P sei ajuda RAEOA hadi’a sistema kontadór
Nia informa, prosesu ba akizisaun ba kontadór no prepago daudaun hein hela materiál sira-ne’ebé sei fornese husi kompañia, bainhira to’o Oekusi mak foin halo instalasaun, ne’ebé prosesu atu hahú aplika sei akontese iha tinan oin.
Iha fatin hanesan, Pontu Vokál EDTL Oekusi, Antão Cabal, informa, durante ne’e, parte EDTL hala’o ona instalasaun iha área urbana sub-rejiaun Pante Makasar, enkuantu sub-rejiaun Oésilo, Pássabe no Nítibe maka sei kontinua uza elétrika ho gratuita.
“Ami sei kria kondisaun, sei hein materiál sira-ne’ebé sei importa husi kompañia mai husi nasaun viziñu, liliu kontadór konvensionál ho kontadór prepago, depois mak ita foin bele halo instalasaun ba kliente sira hotu inklui instituisaun Estadu,” nia hateten.
Notísia relevante:Reseita no despeza EDTL Oekusi dezekilíbriu
Dokumentu ofisiál ne’ebé Ajénsia Tatoli,I.P, asesu, instalasaun kontadór ba iha sub-rejiaun suku no aldeia, sei fornese materiál husi kompañia Malibesib7 Unipesoál Lda, ho valór rihun $89,000.00 ho númeru konkursu públiku 072/SRAP/RAEOA-TL/VIII/2026.
Jornalista: Abílio Elo Nini
Editór: Rafael Ximenes de A. Belo
