Liga Timorense sei hahú hikas iha 23 Outubru ba époka 2027

DILI, 14 Outubru 2026 (TATOLI) – Prezidente Liga Futeból Timor-Leste (LFTL), Ipolito Soares, hateten Liga Timorensa sei hahú fali iha loron 23 fulan-Outubru, ba époka 2027, ho kalenáriu ne’ebé ajusta tuir FIFA nian atu labele prejudika jogadór selesaun nasionál sira.

“Ita-nia Liga sei hala’o fali iha loron 23 fulan-outubru, ne’e ba époka 2027, kalenáriu ita ajusta tuir FIFA nian atu nune’e labele prejudika ita-nia jogadór selesaun nasionál sira,” Prezidente LFTL hateten ba TATOLI via WhatsApp, Kuarta ne’e.

Nia esplika katak iha tinan ne’e, liga sei la’o ho jogu primeira ronda, no iha Janeiru tinan oin sei kontinua fali ho segunda ronda, atu nune’e bele halo kompetisaun full.

Órgaun liga enkontru ona ho Governu no Federasaun Futeból Timor-Leste (FFTL), no iha loron hira ba koruk liga enkontru ona ho klube sira, no klube sira hotu aseita ona ho desizaun ne’e.

“Iha mudansa uitoan iha kompetisaun ba tinan ida-ne’e kona-ba jogadór estranjeiru. Iha tinan kotuk, jogadór estranjeiru bele joga na’in-lima de’it, maibé agora sira bele joga na’in-neen iha klube ida, no kada klube bele rejista jogadór estranjeiru na’in-ualu. Só ida-ne’e mak iha mudansa,” Ipolito tenik.

Ipolito Soares hatutan katak sira hotu hein katak Liga Timorensa iha époka ne’e bele la’o ho susesu hanesan époka rua kotuk.

Jornalista: Hortêncio Sanchez