MPIE ezekuta 49% husi OJE tinan ne’e 

DILI, 14 Outubru 2026 (TATOLI) – Ministru Planemantu Investimentu no Estratéjiku, Gastão de Sousa, relata ezekusaun orsamentu ministériu ho ninia instituisaun tutela sira, hahú husi Janeiru to’o Setembru 2026, hamutuk millaun $164,41 (49%), husi totál alokasaun millaun $332,65.

Ministru esplika katak instituisaun ne’ebé tutela ba MPIE mak hanesan, Ajénsia Dezenvolvimentu Nasionál (ADN), Komisaun Nasionál Aprovizionamentu (CNA, sigla portugés), Fundu Dezenvolvimentu Kapitál Umanu (FDCH, iha portugées) no Sekretariadu Grade Projetu (SGP, sigla portugés).

“Ministériu Planeamentu no Investimentu Estratéjiku, hanesan estrutura sentrál, ita diretamente ezekuta ona millaun $2,4 (ka taxa ezekusaun 53%) husi alokasaun millaun $4,28. Maibé, se ita konta ho obrigasaun no kompromisu kabimentadu, taxa sa’e ba 68,35% ou ekivale valór millaun $2.93”, Gastão de Sousa informa.

Husi ezekusaun sira ne’ebé iha ministru mós relata progresu serbisu kada instituisaun nian hanesan ba AND, kontinua aselera serbisu sira krusiál ba dezenvolvimentu nasionál, tuir atribuisaun kompeténsia iha Dekretu-Lei númeru 60/2020, loron 25 Novembru, konsege vetifika projetu hamutuk 2.110 no inspesiona projetu hamutuk 3.133.

Tuir nia, husi rezultadu projetu verifikasaun ne’e ba poupansa husi verifikasaun orsamentu millaun $533,4 no poupansa husi inspesaun saving millaun $66,7.

“Komisaun Nasionál Aprovizinamentu ezekuta ona 69% husi alokasaun to’o Setembru”, dehan.

Nia subliña katak ba CNA iha portofóliu obra públika ka dadus projetu husi 2025 to’o 2026 rejista totál projetu hamutuk 461, totál projetu ein-kursu hamutuk 44, projetu ne’ebé bele finaliza to’o iha Dezembru 2026 hamutuk 26, totál kustu estimativa $3.294.641.656,98, totál valór kontratu $826.148.077,11, totál valór projetu 26 ne’ebé finaliza to’o Dezembru hamutuk $2.256.624,98.

Ba Fundu Dezenvolvimentu Kapitál Umanu (FDCH), to’o Dezembru ezekuta ona millaun $12,2 (59%) husi totál alokasaun millaun $20,6.

“Kona-ba benefisiáriu, bolsa estuda ita rejista to’o Setembru 2026 hamutuk 3.388, husi ne’e ba feto 1.827, mane 1.561. Distribuída entre formasaun profisionál, formasaun téknika, bolsa estudu no dezenvolvimentu institusionál”, nia dehan.

Ba Fundu Infraestrutura, to’o Setembru rejista 60% ekivalente millaun $144,8 ezekutadu husi millaun $241,7 alokadu. Iha portofóliu ne’e, kompostu husi programa 30 – ne’ebé konsentra projetu boot, ezekusaun rejista 65%, enkuantu projetu seluk iha 42%.

“Ami mantein projesaun ba ezekusaun to’o Dezembru entre 98-100%”, nia konklui.

Jornalista: Arminda Fonseca

Editora: Maria Auxiliadora