Yudi Pamunkas: “Ha’u kumpre de’it kompeténsia ne’ebé lei fó”
DILI, 14 Outubru 2026 (TATOLI)—Juís Administradór Tribunál Judisiál Primeira Instánsia Dili, Yudi Pamunkas, afirma katak nia sei hala’o kna’ar tuir de’it kompeténsia ne’ebé lei fó ba nia no laiha intensaun atu halo kna’ar ultrapasa nia autoridade.
“Ha’u-nia kna’ar mak jere tribunál, la’ós halo buat seluk. Ha’u sei kontinua hala’o kna’ar tuir kompeténsia ne’ebé lei fó mai ha’u,” Yudi Pamunkas hateten ba jornalista sira iha edifísiu Tribunál Dili, Kaikoli, Kuarta ne’e.
Nia esplika katak Lei Organizasaun Judisiária fó kompeténsia ba Juís Administradór atu reprezenta no jere tribunál, inklui organiza gabinete ba juís sira.
Yudi lakohi fó komentáriu kle’an kona-ba juís na’in-haat ne’ebé seidauk muda ba tribunál seluk, maski Konsellu Superiór Majistratura Judisiária (KSMJ) foti ona desizaun kona-ba transferénsia ba sira.
“Husu atu konfirma diretamente ho juís hirak-ne’e, atu sira bele esplika sira-nia pozisaun kona-ba desizaun ne’ebé foti ona. Ha’u, nu’udár Juís Administradór, iha responsabilidade atu tau-matan ba juís sira-ne’ebé koloka iha Tribunál Dili. Kona-ba juís sira-ne’ebé la koloka iha tribunál ne’e, ha’u la tama iha asuntu ne’e,” nia afirma.
Nia hatutan katak prosesu reorganizasaun tribunál nian seidauk tama ba faze implementasaun, tanba sei iha preparasaun no organizasaun gabinete ba juís sira.
“Prosesu reorganizasaun seidauk implementa medida konkreta, tanba foin iha faze preparasaun,” nia dehan.
Kona-ba asuntu seguransa, liuliu kona-ba alegasaun katak pesoál seguransa husi Prezidente Tribunál Rekursu tama ba gabinete juís nian atu husu sira atu husik fatin, Yudi hatán katak pesoál seguransa bele halo koordenasaun ho administrasaun tribunál atu trata situasaun sira-ne’ebé mosu.
Maski nune’e, nia afirma katak to’o agora seidauk iha medida konkreta ne’ebé hala’o atu rezolve asuntu referidu.
Iha sorin seluk, Jurista Sérgio Dias Quintas manifesta preokupasaun kona-ba kategoria juís ne’ebé bele nomea atu hala’o kna’ar hanesan Juís Administradór iha Tribunál Judisiál Primeira Instánsia.
Quintas defende katak juís sira ho kategoria segunda klase mós iha kapasidade no kualidade atu hala’o responsabilidade administrativu iha tribunál.
“Bele nomea juís sira segunda klase atu hala’o kna’ar hanesan Juís Administradór, tanba juís sira ho kategoria ne’e mós iha kapasidade no kualidade atu hala’o kna’ar ne’e ho di’ak,” Quintas hateten.
Nia esplika katak kna’ar Juís Administradór nian importante tebes, liuliu iha jestaun tribunál no distribuisaun prosesu judisiál ba juís sira.
“Prosesu hotu ne’ebé tama iha tribunál sei liuhosi mekanizmu distribuisaun, atu garante prosesu sira fahe ba juís sira tuir prosedimentu ne’ebé aplika,” nia subliña.
Kontekstu
TATOLI relata ona katak iha 14 Outubru 2026, mosu dezentendimentu iha Tribunál Judisiál Primeira Instánsia Dili relasiona ho desizaun KSMJ atu transfere juís na’in-haat ba tribunál seluk. Juís hirak-ne’e kontinua hala’o kna’ar iha Tribunál Dili tanba sira kontesta desizaun ne’e no aprezenta reklamasaun.
Situasaun ne’e mosu diskusaun entre juís sira no Juís Administradór Yudi Pamunkas, no hamosu preokupasaun kona-ba funsionamentu tribunál no adiamentu prosesu julgamentu. KSMJ mak órgaun ne’ebé iha kompeténsia atu jere no dixiplina atividade majistradu judisiál, inklui nomeasaun, kolokasaun no transferénsia juís sira.
Lee notísia relevante iha: Mosu dezentendimentu iha Tribunál Dili.
Jornalista: Natalino Costa
Editór: Xisto Freitas da Piedade
