AFHD Maucatar husu Governu apoia feto rurál hodi hametin ekonómia família
KOVALIMA, 15 Outubru 2026 (TATOLI)- Asosiasaun Feto Hamutuk ba Dezenvolvimentu (AFHD) Kovalima, husu Governu Timor-Leste, liuhosi Ministériu Agrikultura, Peska, Pekuaria no Floresta (MAPPF), atu fó apoiu ba feto agrikultór sira iha Suku Matai, Postu Administrativu Maucatar, Munisípiu Kovalima, hodi dezenvolve atividade agríkola no hametin ekonómia lokál.
Feto Rurál sira hato’o pedidu ne’e hodi liga ba komemorasaun Loron Internasionál Feto Rurál, ne’ebé selebra kada loron 15 fulan-Outubru, atu valoriza kontribuisaun feto rurál sira-nian ba seguransa alimentar, ekonómia família no dezenvolvimentu komunidade.
Biban ne’e, Prezidente Asosiasaun Feto Hamutuk ba Dezenvolvimentu (AFHD) Kovalima, Fátima Amaral konsidera katak feto rurál sira iha papél importante iha produsaun ai-han, jestaun rekursu lokál no hadi’a kondisaun moris família nian.
“ Iha Maucatar feto rurál sira organiza-aan iha grupu agrikultura, grupu rai no empresta osan no grupu prosesamentu ai-han lokál atu dezenvolve produtu ho valór komersiál no aumenta rendimentu família”, Prezidente Asosiasaun Feto Hamutuk ba Dezenvolvimentu Kovalima, Fátima Amaral, hato’o liuhusi Konferénsia ba Imprensa iha Suku Matai,postu Maucatar.
Tanba ne’e, nia husu Ministériu Agrikultura no instituisaun relevante sira atu fó apoiu tékniku, formasaun no asesu ba rekursu ne’ebé presiza, hodi hametin kapasidade grupu feto sira-nian no haburas atividade ekonómika lokál.
Nia mós husu Sekretariadu Estadu Igualdade (SEI) atu apoia grupu feto sira ne’ebé hala’o atividade rai no empresta osan no grupu ne’ebé prosesa ai-han lokál iha Postu Administrativu Maucatar.
Asosiasaun ne’e hein katak apoiu husi Governu bele aumenta oportunidade ekonómika ba feto rurál sira no hametin sira-nia kontribuisaun ba dezenvolvimentu sustentável iha Timor-Leste.
Bazeia ba dadus feto rurál sira iha Suku Matai,Postu Administrativu Maucatar hamutuk 200-resin.
Notisia relevante:SEI apoiu rihun $800 ba grupu feto rurál
Jornalista:Celestina Teles
Editór:Florencio Miranda Ximenes
