Bairru rua iha Tasi-Tolu prontu hamamuk fatin ba konstrusaun estádiu nasionál
DILI, 12 Outubru 2026 (TATOLI) – Komunidade sira ne’ebé hela iha Bairru Ex-Pameran no Bairru João Paulo II, área Tasi-Tolu, prontu hamamuk fatin iha tempu ne’ebé Governu determina, atu fó dalan ba konstrusaun estádiu nasionál ho padraun internasionál. Maibé, komunidade sira husu Governu atu selu uluk indemnizasaun ba uma no patrimóniu ne’ebé afetadu molok hala’o prosesu despeju.
Xefe bairru Ex-Pameran Tasi-Tolu, Cândido Maria, haktuir katak iha fulan-Setembru liubá, Governu liuhusi Sekretaria Estadu Terras no Propriedade, hamutuk ho Federasaun Futeból Timor-Leste (FFTL), Ministériu Obras Públikas (MOP) no Sekretaria Estadu Asuntu Toponímia no Organizasaun Urbana(SEATOU), hala’o ona diálogu ho komunidade sira iha Aldeia 12 Outubru, inklui bairu Ex-Pameran no Bairu João Paulo II, atu husu sira-nia kolaborasaun ba prosesu hamamuk fatin.
Nia hateten katak uma-kain hamutuk na’in-400 resin ne’ebé partisipa iha diálogu ne’e aseita atu kolabora ho Governu, hodi fó dalan ba konstrusaun estádiu nasionál ne’ebé sei harii husi FFTL, ho kondisaun katak Governu tenke selu uluk indemnizasaun ba uma no patrimóniu sira ne’ebé afetadu.
“Uma-kain na’in-400 resin ne’ebé partisipa iha diálogu ne’e hotu aseita atu hamamuk fatin iha tempu ne’ebé Governu determina, maibé tenke indemniza uluk uma sira ne’e molok halo despeju,” Cândido Maria hateten ba TATOLI iha nia fatin servisu iha bairru Ex-Pameran Tasi-Tolu, Segunda ne’e.
Autoridade lokál ne’e husu Governu atu kria kondisaun no determina mekanizmu indemnizasaun molok hahú prosesu hamamuk fatin, atu komunidade sira iha oportunidade buka fatin seluk ba hela-fatin no kontinua sira-nia atividade loroloron, inklui garante katak oan sira-nia prosesu edukasaun la hetan impedimentu.
“Ami rekoñese katak rai ne’e Estadu nian, no ami okupa rai ne’e atu konstrui uma ba atividade komersiál no atividade seluk. Tanba ne’e, bainhira Governu presiza rai ne’e, ami prontu atu hamamuk fatin iha tempu ne’ebé determina, maibé tenke selu uluk indemnizasaun ba ami-nia meiu moris no uma sira ne’ebé ami konstrui ho ami-nia osan rasik,” nia esplika.
Prontu kontribui ba dezenvolvimentu
Cândido Maria aumenta katak ekipa Governu nian iha semana kotuk rekolla ona dokumentu sira no tau markasaun iha uma ida-idak, atu prepara prosesu tuirmai. Nia mós hateten katak, iha tempu badak, Governu sei aprezenta termu aseitasaun ba indemnizasaun molok komunidade sira hamamuk fatin.
“Governu seidauk determina tempu loos atu hamamuk fatin, maibé ami, uma-kain na’in-400 resin, prontu atu sai no kontribui ba dezenvolvimentu nasionál, ho kondisaun katak selu uluk indemnizasaun, atu ami bele buka fatin seluk no kontinua moris loroloron,” nia dehan.
Enkuantu, Monica da Silva, hela iha bairru João Paulo II, reforsa katak komunidade sira prontu kolabora ho Governu atu hamamuk fatin ba konstrusaun estádiu nasionál. Maski nune’e, nia enfatiza katak indemnizasaun tenke selu uluk, atu família sira bele hetan oportunidade atu buka fatin seluk ba hela.
“Kuaze uma-kain na’in-400 resin ne’ebé hela iha bairru Ex-Pameran no bairru João Paulo II, área Tasi-Tolu, prontu atu kolabora no hamamuk fatin, maibé indemnizasaun tenke selu uluk, atu ami bele buka fatin seluk ba hela,” nia afirma.
Antes ne’e, Sekretáriu Estadu Terras no Propriedade, Jaime Xavier, bainhira hala’o diálogu ho komunidade afetada sira iha Tasi-Tolu, iha fulan-Setembru liubá, promete atu koordena ho Ministériu Obras Públikas (MOP) no SEATOU, hodi selu indemnizasaun molok hamamuk fatin ba konstrusaun Estadiun Nasionál ho padraun internasionál, ne’ebé sei harii husi FFTL.
Bazeia ba observasaun jornalista TATOLI iha terrenu, uma sira ne’ebé komunidade afetada hela ba tau markasaun ona husi MOP, hanesan parte husi preparasaun ba prosesu tuirmai molok implementa despeju administrativu iha Aldeia 12 Outubru, bairu Ex-Pameran no Bairru João Paulo II, área Tasi-Tolu.
Notísia relevante:Konstrusaun estádiu multifunsaun foun iha prosesu negosiasaun entre liña ministeriál
Jornalista: Camilio de Sousa
Editór: Rafael Ximenes de A. Belo
