Diversifikasaun ekonomia no investimentu produtivu asegura sustentabilidade fiskál
DILI, 15 Outubru 2026 (TATOLI) – Peskizadór husi La’o Hamutuk, Mariano Ferreira, afirma katak Timor-Leste presiza fó prioridade ba diversifikasaun ekonomia no investimentu produtivu atu asegura sustentabilidade fiskál, liuliu tanba nasaun kontinua depende ba fundu petrolíferu nu’udar fonte prinsipál finansiamentu Estadu.
Mariano hateten katak dezafiu iha setór agrikultura no seguransa ai-han tenke haree mós iha kontestu sustentabilidade fiskál, konsidera dependénsia Timor-Leste ba Fundu Petrolíferu.
Bazeia ba análiza Fundu Monetáriu Internasionál (IMF) iha 2025, iha senáriu baze ho polítika atuál, Fundu Petrolíferu projeta atu esgota iha tinan-2038.
IMF rekomenda ba Timor-Leste atu hametin mobilizasaun reseita doméstika, hadi’a efisiénsia despeza públika, hala’o reforma fiskál no promove diversifikasaun ekonomia hodi asegura sustentabilidade finanseira iha tempu-naruk.
“Tuir La’o Hamutuk, Fundu Petrolíferu nu’udar fundu soberanu tenke jere no uza ho responsabilidade interjerasionál, atu asegura katak rekursu ne’e la’ós de’it benefísia jerasaun ohin, maibé mós jerasaun futuru,” Pesikadór La’o Hamutuk, Mariano Ferreira hateten ba Jornalista sira iha nia servisu fatin Marconi, Fatuhada Dili iha kinta ne’e.
Notísia relevante:La’o Hamutuk apela Governu haforsa agrikultura no sistema ai-han sustentavel
Tanba ne’e, investimentu públiku tenke kontribui ba dezenvolvimentu kapasidade produtiva, kapitál umanu, infraestrutura nesesária no kriasaun oportunidade ekonomia sustentavel.
Nia enfatiza katak investimentu públiku iha setór agrikultura tenke avalia bazeia ba rezultadu, benefísiu ba populasaun, sustentabilidade no kontribuisaun ba diversifikasaun ekonomia nasionál.
“Diversifikasaun ekonomia konsidera nu’udar prioridade estratéjika ba Estadu, liuliu antes Fundu Petrolíferu esgota, hodi dezenvolve setór produtivu no kria fonte reseita sustentável ba nasaun,’’ nia tenik.
Ho nune’e, utilizasaun Fundu Petrolíferu tenke orienta ba investimentu ne’ebé bele hametin kapasidade ekonomia nasionál, aumenta produtividade no hamenus dependénsia ba reseita petrolífera, hodi prevene risku krize fiskál iha futuru.
Jornalista: Camilio de Sousa
Editór: Rafael de A. Ximenes Belo
