Empreza Leusari entrega motorizada 38 ba Autoridade Munisípiu Vikeke
VIKEKE, 15 Outubru 2026 (TATOLI)—Empreza Leusari Unipessoal, Lda. entrega ona motorizada marka Verza hamutuk unidade 38 ba Autoridade Munisípiu Vikeke, atu apoia servisu Konsellu Polisiamentu Komunitáriu (KPK) iha suku sira.
Diretór Servisu Apoiu Organizasaun Naun Govermentál no Komunitária Munisípiu Vikeke, Cosme Sarmento, hateten katak motorizada hirak-ne’e rai hela iha resintu Administrasaun Munisípiu Vikeke no sei distribui ba suku sira-ne’ebé estabelese ona estrutura KPK.
“Kona-ba sosa motorizada ne’e, empreza ne’ebé manán konkursu fornese ona motorizada hamutuk unidade 38 ba ami. Motorizada hirak-ne’e daudaun ne’e rai hela iha resintu Administrasaun Munisípiu Vikeke,” Cosme Sarmento hateten ba TATOLI, iha resintu Administrasaun Munisípiu Vikeke, Kuarta ne’e.
Nia esplika katak motorizada hirak-ne’e sei fasilita membru KPK sira atu atende problema no nesesidade seguransa iha komunidade, liuliu bainhira akontese problema ruma iha suku.
“Motorizada hirak-ne’e ita sei distribui ba suku sira iha Munisípiu Vikeke atu membru KPK sira bele uza hodi atende problema ne’ebé mosu iha komunidade. Tanba ne’e, iha orsamentu 2026 ita aloka ona osan atu sosa motorizada ba KPK,” nia akresenta.
Cosme informa katak Munisípiu Vikeke iha suku hamutuk 38, maibé suku balun seidauk estabelese estrutura KPK, nune’e seidauk bele simu motorizada. Suku hirak-ne’e mak hanesan Babulu no Afalokai, iha Postu Administrativu Uatulari, no Vikeke Vila mak Uma-Ua’in Kraik no mós suku rua seluk hanesan Uaibobo no Uabubu, iha Postu Administrativu Ossú.
Cosme dehan katak suku sira-ne’ebé seidauk estabelese estrutura KPK sei simu motorizada depoizde estabelese estrutura no aprezenta lista membru sira ba autoridade munisípiu.
Nia mós subliña katak motorizada hirak-ne’e tenke uza tuir finalidade servisu KPK nian, la’ós ba atividade seluk ne’ebé laiha relasaun ho kna’ar organizasaun ne’e.
“Kona-ba suku sira-ne’ebé seidauk estabelese KPK, ami sei entrega motorizada bainhira estrutura KPK estabelese ona no sira aprezenta lista estrutura ba autoridade munisípiu. Motorizada ne’e tenke uza de’it ba nesesidade servisu KPK nian, labele uza ba atividade seluk ne’ebé laiha relasaun ho KPK,” nia hato’o.
Nia hatutan katak planu distribuisaun motorizada sira-ne’e aprezenta ona ba Prezidente Autoridade Munisípiu Vikeke atu halo koordenasaun ho ministériu relevante sira, hodi partisipa iha serimónia entrega.
“Fulan ida-ne’e ami seidauk distribui motorizada ba suku sira tanba sei halo koordenasaun ho autoridade no ministériu sira atu partisipa iha serimónia entrega. Ami planeia atu distribui motorizada hirak-ne’e iha fulan-Novembru 2026,” nia tenik.
Kontekstu
Iha 12 Fevereiru 2026, TATOLI relata katak Autoridade Munisípiu Vikeke planeia atu sosa motorizada unidade 38 hodi apoia servisu KPK iha suku 38. Informasaun foun kona-ba entrega motorizada hirak-ne’e hatudu katak fornesimentu husi empreza Leusari realiza ona, enkuantu distribuisaun ba suku sira sei hala’o tuir planu autoridade munisípiu nian.
Lee notísia anteriór iha link ne’e: https://tatoli.tl/2026/02/12/autoridade-vikeke-sei-sosa-motorizada-unidade-38-apoiu-servisu-kpk-iha-suku-38/
Jornalista: Vitorino Lopes da Costa
Editór: Xisto Freitas da Piedade
