Juíz sira husi Tribunál Dili hasoru Primeiru-Ministru Xanana
DILI, 15 Outubru 2026 (TATOLI)–Juíz sira husi Tribunál Judisiál Primeira Instánsia Dili (TJPD), Kinta ne’e, hasoru malu ho Primeiru-Ministru (PM), Kay Rala Xanana Gusmão hodi informa pontu situasaun sira ne’ebé akontese iha Tribunál, liga ho Konsellu Superiór Majistratura Judisiária nia desizaun halo transferénsia juíz na’in-haat bá Tribunál seluk.
Juíz sira hasoru PM Xanana nu’udar aktu solidaridade ba juíz na’in-haat hanesan Juíza Ana Paula Fonseca, Juíza Francisca Cabral, Juíz José Gonçalves no Juíz António Fonseca.
Hafoin enkontru ho Xefe Governu, Juíz sira tun mai ho oin hamnasa no amigável ba jornalista sira.
Biban ne’e, Juíz António Fonseca lakohi fó komentáriu kle’an kona-ba razaun hasoru malu ho Xefe Governu.
“Deskulpa, la’ós ami lakohi ko’alia, maibé ne’e so ami-nia konsellu mak bele ko’alia, no ami-nia advogadu mak reprezenta ami hodi bele ko’alia ida-ne’e,” António Fonseca hateten ba Jornalista sira hafoin enkontru ho PM Xanana iha Palásiu Governu, Kinta ne’e.
Notísia relevante : Posibilidade, Advogadu privadu Juíz na’in-haat sei keixa eskoltu PTR ba MP
Maski nune’e, Majistradu Judisiál na’in-haat la kumpre hela desizaun Konsellu Superiór no mantein serbisu iha Tribunál Dili hodi hein desizaun ikus rekursu kontensioza ne’ebé aprezenta ona ba Tribunál Rekursu.
Iha Kuarta (13/10) mosu dezentedimentu iha Tribunál Dili bainhira Korpu Seguransa Pesoál akompaña funsionáriu husi Tribunál Rekrusu, husu juíz na’in-haat atu hamamuk sira-nia fatin hodi entrega fali ba juíz sira seluk halo serbisu.
Juíz sira rekuza aktu ida-ne’e, nune’e hamosu diskusaun hodi rezulta konfrontu entre juíz sira no Juíz Administradór Tribunál Judisiál Primeira Instánsia Dili iha Tribunál Dili.
Relasiona ho juíz sira-nia audiénsia ho Xefe Governu, audiénsia julgamentu ba prosesu sira iha tempu dadeer nia tenke halo adiamentu no intervinente prosesu sira obrigadu tenke fila.
Jornalista : Natalino Costa
Editora : Julia Chatarina
