Kopa PAM 2026 hahú iha Baukau ho modalidade futeból no futsál
BAUKAU, 15 Outubru 2026 (TATOLI)—Kompetisaun Kopa Prezidente Autoridade Munisipál (PAM) Baukau 2026, Kinta ne’e, hahú ona iha Estádiu Tadeu Laikana, Vila Nova, Baukau, ho modalidade futeból mane no futsál feto.
Kompetisaun ne’e hetan apoiu finanseiru husi Ministériu Juventude, Desportu, Arte no Kultura (MJDAK), ho objetivu atu dezenvolve talentu joven sira iha área desportu.
Prezidente Autoridade Munisipál (PAM) Baukau, Veneranda Eurico Lemos Martins, esplika katak kompetisaun ne’e realiza atu fó oportunidade ba joven feto no mane sira atu hatudu sira-nia talentu desportivu, hametin unidade no promove pás no estabilidade iha munisípiu.
“La’ós osan mak halo ita hamutuk, maibé ita-nia hahalok no vontade atu hatudu partisipasaun iha dezenvolvimentu desportivu. Liuliu, ita hakarak hatudu katak Baukau-oan sira hadomi pás no estabilidade,” Veneranda Lemos hateten iha Estádiu Tadeu Laikana, Vila Nova, Kinta-feira.
Eis-deputada ne’e relata katak, hafoin hetan apoiu finanseiru husi MJDAK, AMB hamutuk ho Grupu Juventude Dezenvolve Futeból (GJDF) hala’o enkontru koordenasaun atu prepara Kopa PAM 2026.
Nia husu ba klube partisipante sira atu hatudu espíritu desportivu durante kompetisaun, hodi kria oportunidade ba joven sira atu dezenvolve kapasidade no prepara an ba kompetisaun desportiva iha futuru.
“Ita hein katak ekipa sira sei hatudu kualidade di’ak, nune’e iha futuru sira bele sai atleta nasionál,” Veneranda Lemos akresenta.
Iha fatin hanesan, Ministru Juventude, Desportu, Arte no Kultura, Nelyo Isaac Sarmento, hateten katak ministériu fó apoiu finanseiru ba kompetisaun ne’e atu reativa no dezenvolve desportu iha munisípiu sira, hahú husi modalidade futeból.
Nia esplika katak, iha futuru, Governu hakarak aumenta modalidade desportiva sira no lori atividade desportiva to’o komunidade rurál sira.
“Inisiativa ida-ne’e hahú husi baze, hanesan eskola, postu administrativu no munisípiu sira. Husi ne’ebá mak ita bele prepara no dezenvolve atleta sira-ne’ebé iha futuru bele sai atleta nasionál,” Nelyo Isaac hateten.
Ministru ne’e mós promete katak MJDAK sei kontinua apoia orsamentu ba AMB kada tinan atu organiza kompetisaun desportiva, ne’ebé planeia atu sai parte husi Festivál Desportivu Munisipál. Planu ne’e liga ho selebrasaun loron Fundasaun Munisípiu Baukau, iha fulan-Abríl.
Abertura Kopa PAM 2026 ne’e loke ofisialmente husi ministru Nelyo Isaac Sarmento. Jogu dahuluk hala’o entre klube Destinu no Amadora, ho prezensa PAM Baukau, Komandante PNTL Munisípiu Baukau, Superintendente João Sancho Pires, autoridade sivíl no militár, no adeptu desportu sira.
Kompetisaun futeból onze ne’e envolve klube mane hamutuk 28, enkuantu modalidade futsál feto envolve klube hamutuk ualu, tuir informasaun husi komisaun organizadora. Kompetisaun ne’e hetan apoiu finanseiru husi MJDAK ho montante US$10.600.
Kontekstu
Antes ne’e, TATOLI relata katak Autoridade Munisipál Baukau (AMB) hamutuk ho Grupu Juventude Dezenvolve Futeból (GJDF) prepara Kopa PAM 2026 atu fó espasu ba joven feto no mane sira atu partisipa iha atividade desportiva no dezenvolve sira-nia talentu.
Lee notísia relevante: AMB ho GJDF sei realiza Kopa PAM iha Baukau.
Jornalista: Natalino Belo
Editór: Xisto Freitas da Piedade
