MJDAK prepara estatutu ba órgaun rua atu implementa Lei Prátika Arte Marsiál
DILI, 15 Outubru 2026 (TATOLI) – Ministériu Juventude, Desportu, Arte no Kultura (MJDAK) prepara hela estatutu ba kriasun órgaun rua ne’ebé sei implementa lei foun Rejime Jurídiku Ensinu Aprendizajen Prátika Arte Marsiál.
Ministru Juventude, Desportu, Arte no Kultura, Nelyo Isac Sarmento, hatete agora elabora hela estatutu funsaun ba órgaun rua ne’ebé sei iha responsabilidade ba prátika arte marsiál nian.
Governante ne’e dehan órgaun ida sei regula funsaun ba organizasaun arte marsiál iha ámbitu desportu ne’ebé ko’alia kona-ba kompetisaun desportu, no órgaun seluk ho knaar atu regula no halo fiskalizasaun ba funsionamentu organizasaun desportu no organizasaun arte marsiál ne’ebé komete krime.
“Órgaun rua ne’e nia estatutu funsaun iha ona. Agora, ami sei hein pareser husi liña ministeriál relevante sira, hodi akumula tan ideia balun iha fulan ne’e nia laran, hafoin
lori bá Konsellu Ministru hodi hetan apresiasaun no desizaun”, nia hatete ba Tatoli, ohin.
Komisaun Reguladora Arte Marsiál (KRAM) halo ona aprosimasaun ho organizasaun arte marsiál sira hotu no tempu badak sei iha reuniaun boot ho sira hodi introdús implementasaun lei ne’e.
Aleinde ne’e, Federasaun Silat Timor-Leste mós kolabora hamutuk ho órgaun prátika arte marsiál ba desportu hodi komesa haree funsaun ba prepara rekursu ba arte marsiál rasik, prepara programa atividade formasaun no kompetisaun.
“Buat ne’ebé ami hatete ba iha organizasaun Silat, atu evita ona lori ita-nia membru sira bá beibeik Indonézia sa’e sintu. Di’ak liu ita uza kolaborasaun ho Governu Indonézia ne’ebé ita agora esforsu hela atu serbisu hamutuk ho Persatuan Silat Indonézia, hodi komesa prepara ita-nia ema iha organizasaun arte marsiál atu hetan formasaun, atu sa’e sintu la presiza bá iha ne’ebá”, nia dehan.
Kestiona kona-ba regra foun sira iha lei ne’ebé organizasaun presiza kumpre, governante ne’e hatete katak komisaun rua ne’e mak sei regula no halo fali rejistu ba arte marsiál no arte marsiál ramu silat, identifika loloos organizasaun nia estrutura, define nia formasaun no haree ninia klubu sira ne’ebé atu fó treinu. “Bainhira la kumpre sei hetan sansaun administrativa no bele kadeia”, nia afirma.
Antes ne’e, Prezidente Komisaun A iha Parlamentu Nasionál, Natalino dos Santos, husu ba Governu atu prepara dekretu no diploma hodi garante implementasaun lei sira ne’ebé Parlamentu aprova ona inklui Lei Rejime Prátika Arte Marsiál.
Notísia relevante: https://tatoli.tl/2026/10/12/komisaun-a-solisita-ba-governu-garante-implementasaun-lei-sira-neebe-aprova-ona/
Jornalista: Nelson de Sousa
Editora: Maria Auxiliadora
