PTR Carmona iha koñesimentu eskoltu sira akompaña funsionáriu bá Tribunál Dili
DILI, 15 Outubru 2026 (TATOLI)–Prezidente Tribunál Rekursu (PTR), Afonso Carmona iha koñesimentu Korpu Seguransa Pesoál sira akompaña funsionáriu sira husi Tribunál Rekursu hodi bá Tribunál Judisiál Primeira Instánsia Dili.
Nia dehan, eskoltu sira ne’e bá akompaña de’it, sira la halo buat ruma iha Gabinete Juíz sira no la obriga Juíz sira atu hamutuk sira-nia fatin.
“Eskoltu ne’e ha’u-nia eskoltu, ne’ebé sira halo buat ruma pasti ha’u hatene, tanba ne’e ha’u dehan ha’u sei konfirma lai, eskoltu sira ne’e la naran la’o, pasti iha pedidu ruma, sira la’ós bá intereven maibé akompaña de’it, maibé orsida ha’u konfirma lai,” PTR Carmona informa ba Jornalista sira iha Tribunál Rekursu, Kaikoli, Kinta ne’e.
Maski nune’e, PTR Carmona seidauk bele fó komentáriu relasiona ho dezentendimentu iha Tribunál Dili, iha Kuarta (14/10) bainhira Korpu Seguransa Pesoál akompaña funsionáriu husi Tribunál Rekursu, husu juíz na’in-haat atu hamamuk sira-nia fatin hodi entrega fali ba juíz sira seluk halo serbisu.
“Ida-ne’e ha’u seidauk bele ko’alia. Buat sira hanesan ne’e desizaun ne’e mai husi Konsellu Superiór Majistradu no funsionáriu sira atu hala’o serbisu. Tanba ne’e mak Polísia akompaña,” nia akresenta.
Notísia relevante : Juíz sira husi Tribunál Dili hasoru Primeiru-Ministru Xanana
Biban ne’e, nia deklara sei defende dignidade Estadu, independénsia Tribunál, no imparsialidade Tribunál.
“Eskoltu sira akompaña funsionáriu sira atu hadi’a odamatan, tanbasá maka problema. Ema hotu tenke komprende Estadu ne’e no kumpre orden Tribunál,” nia afirma.
Prezidente Tribunál Rekrusu realsa, funsionáriu hotu tenke hakruuk ba lei.
“Agora se imi la kumpre regra, ha’u maka atu sala fali, oinsá ha’u defende buat ne’e tanba ema hotu tenke kumpre Estadu. Ita ne’e defende Estadu de’it, to’o tempu ema hasai ita hotu ona, Polísia mós defende Estadu la’ós halo problema,” Carmona argumenta.
Prezidente Tribunál Rekrusu dehan, tuir loloos eskoltu ne’e fó seguransa de’it ba nia, maibé bainhira laiha ona solusaun mak presiza akompaña funsionáriu sira halo serbisu.
Carmona hateten, nia disponível atu halo diálogu ho juíz sira iha Tribunál Primeira Instánsia sira, tanba ne’e nu’udar meiu di’ak atu buka solusaun.
Tribunál Rekursu mak deside transferénsia juíz
Prezidente Tribunál Rekursu hateten, atu deside reklamasaun juíz na’in-haat ninia transferénsia ne’e Tribunál Rekursu mak deside la’ós Konsellu Superiór Majistratura Judisiária.
Nia dehan, tuir andamentu prosesuál, reklamasaun ne’e la’ós ba Konsellu Superiór tantu Prezidente Tribunál Rekrusu mak atu foti desizaun.
“Kona-ba reklamasaun ne’e ba Tribunál hodi deside, la’ós reklama fali ba ema ne’ebé mak deside ne’e, tanba ne’e orden Tribunál. Ha’u maka deside mak sira reklama. Agora Konsellu Superiór Majistratura Judisiária maka deside ne’e sira reklama ba Konsellu Superiór atu halo saida, tuir loloos sira-nia reklamasaun ne’e ba Tribunál, kuandu sira bá fali Konsellu Superiór ne’e signifika sira interven Konsellu nia serbisu liga ho saida mak sira halo ba serbisu Tribunál nian,” Carmona hateten ba Jornalista sira iha Tribunál Rekursu, Kinta ne’e.
Biban ne’e, nia lakohi fó komentáriu kle’an ba asuntu ida-ne’e ho razaun atu defende Estadu nia labele ko’alia.
“Jogu sira la’o ne’e ema joga nia, joga Tribunál, di’ak liu Tribunál rahun hamutuk ho nia,” nia tenik.
Jornalista : Natalino Costa
Editora : Julia Chatarina
