SEFOPE mobiliza traballhadór timoroan 95 servisu iha Nova Zelandia
DILI, 15 Outubru 2026 (TATOLI)-Sekretária Estadu Formasaun Profisionál no Empregu (SEFOPE) liuhusi Dirasaun Nasionál Empregu Estranjeiru (DNEE) kontinua mobiliza tan traballadór hamutuk na’in-95 ba servisu iha Nova Zelandia.
Notísia Relevante: Empregadór Nova Zelandia sei rekruta traballadór timoroan na’in-95
Traballadór na’in-95 ne’e halo rekrutamentu iha 2026 ne’e, SEFOPE rejista kandidatu na’in-117 kompostu husi feto 13 no mane 105 mak hetan referénsia ba teste médiku atu ba servisu iha Nova Zelandia, maibé kandidatu na’in-95 mak susesu (aprovadu) ne’ebé kompostu husi feto na’in-10 no mane na’in-85, enkuantu durante teste iha kandidatu na’in-lima (5) falla no na’in-hitu (7) kansela.
Sekretáriu Estadu Formasaun Profisionál no Empregu, Rogério Araújo Memdonça, hateten katak bainhira atu mobiliza traballadór sira ba rai-li’ur sempre iha kustume despedida.
“Traballadór sira-ne’e sei aranka iha fulan-Outobru no Novembrur. Taballadór sira sei ba servisu ho kontratu fulan hitu iha área ortikultura. Kompañia ne’ebé daudaun rekruta sira-ne’e mak iha haat Teamwork, MR. Apple, JCR no Fairfield Drchards,” Sekretáriu Estadu ne’e relata ba jornalista sira iha Delta Nova, ohin.
Nia mós enkoraja traballadór timoroan sira atu mantein komunikasaun ho família no autoridade sira iha Nova Zelandia hodi garante nafatin imi-nia seguransa durante servisu iha Nova Zelandia.
“Tanba ne’e husu ba traballadór sira atu aproveita oportunidade ida-ne’e, kumprienafatin regra ne’ebé ita-boot skra asina akordu ona no evita sai husi sistema RSE nian,” nia rekomenda.
Nia hatutan ho prezensa empregadór foun neen tan ne’ebé hakarak servisu hamutuk ho Timor-Leste bele fó esperasansa atu aumenta númeru traballadór sira ba servisu iha Nova Zelandia.
Iha oportunidade ne’e mós Sekretáriu Estadu Komunikasaun Sosiál, Expedito Loro Dias Ximenes, lori Governu Konstitusionál da-sia (IX) nia naran hato’o parabéns ba traballadór sira-ne’ebé hetan ona oportunidade ida-ne’e liuhusi programa SEFOPE nian.
“Imi mak sai hanesan embasadór timoroan ne’ebé reprezenta Timor-Leste iha nasaun Nova Zelandia, tanba ne’e imi tenke tane aas identidade nasaun nian no kaer metin prinsípiu ne’ebé deklara iha akordu,” nia apela.
Tuir nia, kultura Timor lahanesan ho Nova Zelándia nian, tanba ne’e tenke abitua ema-nia kultura no respeita hodi kria nafatin relasaun bilaterál.
Tuir reprezentante traballadora husi kompañia Teamwork, Thalia Neca Pereira, sente kontente tanba bele hetan oportunidade ba servisu iha Nova Zelandia, maske iha prosesu rekrutamentu ne’e la fasíl no tenke ultrapasa teste sira-ne’ebé estabeles ona.
“Ha’u hanoin ida-ne’e sai ona dalan mai ha’u atu hadi’a ha’u no família nia moris. Maske distánsia ne’e dook tebes, maibé ha’u sei la hamate sira-nia esperansa mai ha’u,” traballadora ne’e dehan.
Nia dehan, maske nia tenke ba aprende ona kultura foun husi nasaun seluk, maibé ida-ne’e sai ona esperiénsia ida ba nia an no nia husu ba joven sira seluk atu prepara an hodi aproveita oportunidade ne’ebé Governu fó hodi kria rasik empregu iha nasaun ne’e.
“Ha’u mós sei la lori arte marsiál no rituál hodi fó perturbasaun ba ha-nia servisu,” nia dehan.
Enkuantu traballadór ne’ebé daudaun ne’e servisu iha Nova Zelándia hamutuk na’in-36 ne’ebé mesak mane de’it, aumenta tan ho traballadór foun na’in-95 agora hamutuk 131.
Jornalista : Alexandra da Costa
Editór : Cancio Ximenes
