Timoroan dezenvolve servisu transporte online atu promove diversifikasaun ekonomia rai-laran
DILI, 15 Outubru 2026 (TATOLI)—Kompañia nasionál timoroan sira hahú dezenvolve servisu transporte online iha Timor-Leste hodi kria kampu traballu ba timoroan sira seluk no atu promove diversifikasaun ekonomia iha rai-laran.
Notísia Relevante: DNTT prepara dekretu-lei atu regula atividade “ojek online” iha Timor-Leste
Ho dezenvolvimentu teknolojia dijitál ne’e, kompañia privadu balun iha Timor-Leste hahú introdús servisu transporte online bazeia ba sistema pedidu online, liuhusi aplikasaun espesífika ka plataforma komunikasaun dijitál, hanesan TRON Timor, GoTimor, OjeTimor, Tula Ha’u Transporte no MyTimor.
Diretór Kompañia TRON, João Amaral, hateten sira-nia kompañia ne’e harii iha tinan 2025 maibé kona-ba transporte online ne’e sira foin lansa iha fulan-Agostu 2026 ne’e.
“Ami-nia kompañia hetan ona lisensiamentu husi SERVE, I.P, maibé husi DNTT seidauk tanba sira seidauk permite rejistu ba transporte online, maibé ami submete ona karta pedidu ba sira no sempre aproxima koordenasaun. Karik preparasaun dekretu lei ba atividade ne’e iha ona, ami sei koopera ho sira no hala’o servisu tuir regulamentu ne’ebé iha,” Direntór ne’e informa ba Agência Tatoli iha ninia edifísiu Kolmera, ohin.
Atividade transporte online ne’e benefísiu tebes ba pasajeiru sira-ne’ebé presiza movimentasaun urjente liuliu iha tempu kalan, mirkolet no taxi labele movimenta to’o kalan, tanba sira-nia operasaun durante 24 oras no ida-ne’e mós sei loke empregu ba joven sira, inklui integra sistema dijitalizasaun nian iha era ida ohin loron.
“Liuhusi aplikasaun TRON TIMOR, kompañia ne’e oferese kategória servisu hitu, mak RIDE ba transporte motorizada, CAR ba táxi online, SEND ba entrega sasán, FOOD ba pedidu hahán, MART ba sosa nesesidade loro-loron, SERVICE ba pedidu servisu no CARGO ba transporte sasán,” nia hateten.
Nia informa, maneira asesu maka pasajeiru sira tenke instala aplikasi TRON hodi order ba motor presu hahú husi $1.00 no sura kilometrazen, enkuantu ba karreta hahu husi $2.00 ne’e mós hanesan sura kilometrazen, signifika presu transparante la hamenus no la aumenta.
Nia esplika, bainhira pasajeiru sira atu order otomatikamente presu mosu kedas ona iha sistema aplikasaun TRON Pay, prosesu pagamentu bele direta (Cash) bele mós liuhusi mobile banking.
“Kuaze motorista ne’ebé servisu iha TRON hamutuk 155 kompostu husi kaereta no motor, sira konsege tula ona pasajeiru ne’ebé rejistu iha ami-nia sistema hamutuk rihun-neen , tanba Ita atende ho lais, fasíl no seguru,” nia afirma.
Kuaze motorista sira-ne’e mesak ema kualifikadu de’it tanba antes atu envolve an iha membru TRON, sira tenke prienxe rekezitu sira hanesan submete karta kondisaun válidu, karta inspesaun transporte no tuir formasaun báziku sira hafoin bele halo operasaun, signifika seguransa pasajeiru nian mak prioridade.
“Agora ne’e ami seidauk iha alvu kada motorista ida tenke tula pasajeiru to’o hira, tanba ami sei prepara mós sistema foun tan mak foin bele aplika alvu loron ida tula pasajeiru na’in-lima,” nia relata.
Kona-ba rendeimentu, nia dehan, kompañia ho motorista sei fahe ninia persentajen lahanesan, signifika kompañia sei hetan 15% no motorista hetan 85%. Tanba motorista sira ne’e sira-na’in mak ense kombustível, hadi’ak rasik sira-nia transporte bainhira avária.
Maske servisu ne’e halo operasaun de’it iha Dili laran, maibé sira iha planu ba oin sei mellora to’o munisípiu sira.
“Ne’ebé ami-nia motorista sira prontu atu halo servisu, motorista sira-ne’e proativu tebes kompostu husi estudante no balun servisu iha instituisaun públiku no privadu.Tanba, sira bele halo servisu iha tempu kalan karik, loron sira okupadu ho servisu seluk,” nia hateten.
Enkuantu kona-ba atividade negósiu transporte online seluk ne’ebé Agência Tatoli asesu tan iha ida-idak nia pájina ofisiál mak hanesan GoTimor, liuhusi aplikasaun GOTIMOR RIDE, oferese servisu rezerva karreta ka transporte liuhusi sistema dijitál.
Aplikasaun ne’e iha funsaun GPS atu akompaña movimentu, informasaun kona-ba tarifa viajen, komunikasaun entre kondutór no pasajeiru, no istória viajen sira.
Aplikasaun ne’e jere husi kompañia MKM Unipesoál Lda ne’e mós oferese opsaun kategória viajen, hanesan economy, standard no premium. Aleinde ne’e, GoTimor mós iha aplikasaun GOTIMOR DRIVER atu apoia atividade kondutór sira.
Aleinde plataforma rua ne’e, iha mós kompañia lokál Tula Ha’u Unipeso,ál Lda, liuhusi servisu Tula Ha’u Transporte, mós introdús servisu transporte pasajeiru no entrega sasán iha Dili.
“La hanesan ho kompañia sira-ne’ebé iha ona aplikasaun espesífika, servisu pedidu transporte Tula Ha’u nian agora daudaun sei hala’o liuhusi Facebook no WhatsApp,” refere ba observasaun ne’ebé jornalista asesu iha sira-nia pájina ofisiál.
Enkuantu aplikasaun espesífika ba kompañia ne’e sei iha prosesu dezenvolvimentu no planeia atu lansa iha tempu badak.
Kona-ba OjeTimor mak plataforma seluk ne’ebé sei dezenvolve hela, ho planu atu fornese kategória servisu haa, mak OjeMotor ba transporte motorizada, OjeKareta ba veíkulu roda haat, OjeHahán ba entrega hahán no OjeSasán ba entrega sasán. Maibé, to’o agora OjeTimor sei iha faze dezenvolvimentu no hein lansamentu ofisiál molok hahú hala’o atividade operasionál.
MyTimor Nu’udar pioneiru transporte online molok plataforma sira seluk ne’e hahú dezenvolve iha Timor-Leste, servisu transporte online ho naran MyTimor, ne’e kompaña telekomunikasaun Telkomcel lansa iha loron 04 fulan-Dezembru tinan 2020, liuhusi kooperasaun ho kompañia transporte lokál Corrotrans.
“MyTimor introdús nu’udar ida husi inovasaun dijitál dahuluk iha setór transporte online iha Timor-Leste, ho servisu transporte motorizada, táxi, no entrega sasán no pakote iha área Dili”, dekreta husi dadus ne’ebé Agência Tatoli asesu.
Aplikasaun ne’e lansa durante pandemia COVID-19, ho objetivu atu fasilita movimentu komunidade no apoia atividade ekonómika liuhusi servisu ne’ebé uza teknolojia dijitál. Iha fulan-Juñu tinan 2021, Telkomcel mós dezenvolve funsaun MyFood nu’udar parte ida hosi servisu MyTimor, atu fasilita komunidade halo pedidu no simu hahán hosi restaurante sira iha Dili.
Bazeia ba notísia TATOLI iha loron 21 fulan-Juñu tinan 2021, iha períodu ne’ebá MyTimor rejista aumentu utilizadór sira to’o 80,3%, enkuantu númeru kondutór sira aumenta ho média 17%.
Servisu MyFood mós halo ona kooperasaun ho restaurante liu 80 ne’ebé iha sertifikasaun iha Timor-Leste, liuliu iha Dili.
Maski nune’e, servisu MyTimor agora la rejista ona nu’udar servisu ne’ebé hala’o operasaun hanesan iha tempu inísiu lansamentu.
To’o agora, seidauk hetan informasaun ofisiál husi Telkomcel kona-ba razaun ne’ebé halo servisu ne’e para ka posibilidade atu hahú fali operasaun iha futuru.
Mosu mosu plataforma foun oioin ne’e mak setór transporte online iha Timor-Leste hatudu dezenvolvimentu liuliu iha Sidade Dili. Maske nune’e, númeru totál kompañia sira-ne’ebé ativu, veíkulu sira-ne’ebé rejistadu, no kondutór sira-ne’ebé hala’o hela operasaun seidauk bele konfirma ho loloos, tanba DNTT seidauk iha dekretu lei ba atividade ida-ne’e.
Jornalista : Alexandra da Costa
Editór : Cancio Cimenes
