Assanami: “Laiha mídia, demokrasia mate”
DILI, 16 Outubru 2026 (TATOLI) – Timor-Leste komemorasaun ohin Loron Nasionál Liberdade Imprensa ba Dahaat, ho tema “Mídia Livre Demokrásia Metin”.
Iha selebrasaun ne’e, Vise-Primeiru-Ministru, Ministru Koordenadór ba Asuntu Sosiál no Ministru Dezenvolvimentu Rurál no Abitasaun Komunitária, Mariano Assanami Sabino, parabeniza imprensa Timor-Leste no destaka katak “laiha mídia, demokrasia mate”.
Nia dehan, Timor-Leste iha kompromisu boot nafatin hodi fó liberdade ba imprensa, tanba ne’e mai kedan husi prinsípiu ukun rasik-an.
Governante ne’e haktuir katak iha momentu Timor-Leste nia luta ba independénsia, ema la fó liberdade ba mídia, maibé ema taka ka ema halo presaun oioin, tanba halo kompromisu ida importante iha prosesu konstrusaun Estadu.
“Ho hakruuk fó parabéns ba jornalista sira hotu, ba ema hotu ne’ebé fó nia tempu para fó informasaun ba públiku. Tanba mídia importante tebes ba nasaun. Ita-nia konstituisaun no lei garante liberdade ba imprensa hothotu. Parabéns ba imi hotu, dalaruma imi-nia servisu ema hanoin katak servisu ki’ik ida, maibé importante tebes-tebes, mídia mak klamar ba demokrasia. Laiha mídia, demokrasia mate”, Assanami afirma.
Nia esplika katak demokrasia presiza kritéria importante tolu, mak diskusaun ne’ebé bazeia ba rasiosíniu, mídia sai espasu ba debate no kompetisaun ideia sira, no mídia iha knaar atu deteta no hatudu informasaun loos ba públiku.
Nu’udar vise Primeiru-Ministru hakarak reprezenta Governu hato’o haku’ak boot ba kompañia mídia sira ne’ebé la’o hela, jornalista sira no ema hotu ne’ebé kontribui ba mídia. “Imi hanesan eroi foun ida ba rai ne’e”, dehan.
Nia husu ba instituisaun Estadu sira labele taka informasaun ba mídia sira no ba sé de’it mak durante ne’e la koopera ho mídia, sujere atu kontribui, tenke iha transparénsia no nakloke, tanba mídia sai fatin ne’ebé fo informasaun loloos ba públiku.
Governante afirma katak instituisaun Estadu iha responsabilidade atu fornese informasaun ba mídia, hodi garante katak povu bele partisipa iha prosesu dezenvolvimentu instituisaun sira liuhusi asesu ba informasaun.
Nia mós subliña katak mídia sai ponte atu rona povu nia lian no promove partisipasaun públika iha prosesu konstrusaun Estadu.
Relasiona ho liberdade imprensa iha país, tuir publikasaun Reporters Without Borders (RSF), iha 30 Abríl 2026, Relatóriu Índise Liberdade Imprensa Mundiál tinan 2026, hatuur Timor-Leste okupa pozisaun 30 husi nasaun 180.
Relatóriu ne’e dehan Timor-Leste rejista progresu importante iha setór komunikasaun sosiál, bainhira nasaun sa’e husi pozisaun 39 iha tinan kotuk ba rangking 30 iha 2026.
Notísia relevante: Governu halo abertura feira selebra loron nasionál liberdade imprensa ba da-haat
Jornalista: Arminda Fonseca
Editora: Maria Auxiliadora
