Autoridade RAEOA ho CCLN selebra akordu investe bá Klínika Kurasaun Oekusi

OEKUSI, 16 Outubru 2026 (TATOLI) – Prezidente Autoridade Rejiaun Administrativa Espesiál Oekusi Ambeno (RAEOA), Régio da Cruz Salu kinta ne’e, selebra akordu ho Konsellu Kombatente Libertasaun Nasionál (CCLN, sigla portugés), hodi investe iha Klínika Kurasaun Oekusi.

Objetivu husi akordu ne’e mak CCLN atu halo  investimentu hodi loke izolamentu ida iha Oekusi, nune’e bele redús gastu Estadu nian kona-ba transferénsia pasiente ba rai-li’ur.

“Ita selebra ona akordu, nia objetivu liliu ba ekonómiku, komersiál mak ita hakarak atrai merkadu ne’ebé lorloron hale’u ita. To’o tempu ona katak, iha prosesu inísiu sira ne’e, to’o ha’u-nia tempu, konfiansa sira-ne’ebé aman sira fó mai ha’u, pelu-menus ita tama ona ba operasionalizasaun, iha aspeitu komersiál no negósiu nian,” Prezidente RAEOA, Régio da Cruz, hateten liuhusi komunikadu imprensa ne’ebé Ajénsia TATOLI,I.P asesu, sesta ohin.

Notísia relevante:CCLN koordena Autoridade RAEOA: Posibilidade, sei investe saúde no seguransa iha Oekusi

Autoridade ne’e otimista katak, RAEOA nia prontidaun atu bele hahú era foun, hodi fó razaun ba investimentu infraestrutura estratéjiku sira-ne’ebé  autoridade sesante sira harii ona ho fasilidade modernu ida, kona-ba klínika espesiál, ne’ebé foka ba kurasaun.

Tanba ne’e, nia dehan, Autoridade RAEOA hakarak la’o hamutuk hodi aprende ho CCLN, nune’e bele atende nesesidade espesiál sira ba problema saúde tersiáriu, ne’ebé Timor-Leste hasai osan barak liu ba nasaun seluk.

“Maibé la signifika RAEOA mak opsaun di’ak liu, maibé enkuantu seidauk iha modelu Timor-Leste nian rasik ba asuntu ne’e, nusa mak labele hahú iha Oekusi,” nia afirma.

“Preparasaun ba servisu hamutuk ne’e, aliende asina MoU, Autoridade RAEOA mós liberta ona espasu ida-ne’ebé sufisiénte iha Diresaun Rejionál Agrikultura nian, ba investimentu saúde tomak iha Oekusi,” nia hateten.

Minimiza gastu Estadu

Iha biban ne’e, Prezidente CCLN, Vidal de Jesus Riak Leman informa katak kooperasaun ne’e hanesan programa kontinuasaun, tanba antes ne’e CCLN ho Autoridade RAEOA halo ona kooperasaun kona-ba atividade seguransa iha aeroportu Rota do Sândallo.

Tanba ne’e, nia dehan, ba MoU ne’e, nu’udar desizaun koletiva husi CCLN, maka deside hodi partisipa iha investimentu ba Klínika Kurasaun ne’e, ho objetivu atu minimiza gastu ne’ebé Estadu hasai ba rai-li’ur hodi halo tratamentu ba pasiente timoroan sira.

“Ha’u hanoin kona-ba asinatura memorandu entendimentu ne’e, hanesan atu loke dalan de’it, tanba atividade konkreta balun parte rua hala’o ona. Tempu kotuk ami ba Oekusi, hodi haree no diskute ho Autoridade RAEOA kona-ba Klínika Kurasaun Oekusi, husi diskusaun lubuk ida-ne’e, mak ohin loron ita asina MoU. Ho memorandu ne’e, ita sei halo esforsu atu oinsá ita bele kontrata dotór espesialista sira, hodi bele hala’o kna’ar iha Klínika Kurasaun ne’e”, Riak Leman afirma.

Notísia relevante:Autoridade ofisializa kompañia tolu apoia serbisu iha fasilidade saúde Oé-Cusse  

Jornalista: Abílio Elo Nini

Editór: Rafael Ximenes de A. Belo