MS no AMB Inaugura Postu Saúde foun iha Uatuhako-Venilale

BAUKAU, 16 Outubru 2026 (TATOLI)—Ministériu Saúde (MS), hamutuk ho Autoridade Munisipál Baukau (AMB), inaugura Postu Saúde foun iha área Ariana, Suku Uatuhako, Postu Administrativu Venilale, Munisípiu Baukau, Sesta ne’e, atu hakbesik servisu saúde ba komunidade.

Ministra Saúde, Élia Amarál, esplika katak konstrusaun postu saúde ne’e nu’udár parte husi programa Governu atu hadi’a asesu komunidade ba servisu saúde, liuliu iha área ne’ebé dook husi sentru saúde.

“Governu iha kompromisu atu hakbesik servisu saúde ba komunidade. Ida-ne’e signifika katak atendimentu tenke hahú husi inan grávida to’o bá ema idade avansada,” Ministra Élia Amarál hateten iha serimónia inaugurasaun iha Ariana, Suku Uatuhako.

Nia husu ba profisionál saúde na’in-sia ne’ebé sei servisu iha postu saúde foun ne’e atu hala’o knaar ho responsabilidade no dedikasaun, inklui implementa programa saúde integrada no fó atendimentu bainhira komunidade presiza.

Ministra ne’e mós husu ba líder komunitáriu, inklui xefe suku no xefe aldeia, atu informa no orienta komunidade atu buka atendimentu saúde sedu bainhira sente moras, hodi evita situasaun sai grave.

Iha parte seluk, Prezidente Autoridade Munisipál Baukau, Veneranda Eurico Lemos Martins, husu komunidade iha Ariana, Suku Uatuhako no suku sira iha área besik atu kuida no mantein postu saúde ne’e, atubele uza ba tempu naruk.

“Tinan barak ona komunidade tenke la’o dook atu hetan tratamentu. Agora, hafoin tinan ida, ita sente katak servisu saúde besik liután,” Veneranda Lemos hateten.

Eis deputada ne’e agradese ba Governu, liuliu Ministériu Saúde, tanba apoia konstrusaun fasilidade ne’e, ne’ebé sei aumenta asesu komunidade ba atendimentu saúde.

Nia mós apela ba profisionál saúde sira atu fó atendimentu ho kualidade, hatudu dedikasaun no kumpre responsabilidade profisionál.

Projetu konstrusaun Postu Saúde Ariana ne’e responsabiliza husi Kompañia Caucus, Unipessoal, Lda. Tuir informasaun, durasaun obra ne’e fulan neen no valór orsamentu ne’ebé aprezentada rihun $400-resin.

Kontekstu

Iha fulan-Setembru 2026, TATOLI relata konstrusaun postu saúde no rezidénsia ba profisionál saúde iha Suku Ossoala, Postu Administrativu Vemasse, Munisípiu Baukau. Projetu rua ne’e finansia husi Autoridade Munisipál Baukau liuhusi Programa Dezenvolvimentu Integradu Munisipál (PDIM), ho objetivu atu aumenta infraestrutura saúde no fasilita servisu profisionál saúde iha área rurál.

Lee notísia relevante: Konstrusaun postu no rezidénsia pesoál saúde iha Ossoala hahú ona.

Lee mós: Autoridade suku husu MS harii postu saúde iha Defauasi.

Jornalista: Natalino Belo

Editór: Xisto Freitas da Piedade