CLN rekolla reseita rihun $581 husi atividade fa’an foos
DILI, 19 Outubru 2026 (TATOLI)-Sentru Lojístika Nasionál (CLN, sigla portugés) arrekada reseita $581.599 ba kofre Estadu, liuhusi atividade intervensaun merkadu ne’ebé halo iha munisípiu sira.
“Husi Janeiru to’o Setembru 2026, atividade intervensaun merkadu ka ita fa’an foos direta ba komunidade iha munisípiu 12, inklui Oekusi no Ataúru, ita hetan osan $581.599 husi foos tonelada 1.080”, Prezidente CLN, António de Araújo Soares hatete ba Tatoli, ohin.
Nia esplika katak intervensaun merkadu ne’ebé CLN halo iha munisípiu hothotu, maibé ba liu suku sira ne’ebé dook husi postu administrativu sira.
António de Araújo informa katak daudaun atividade intervensaun merkadu ne’ebé CLN halo para uitoan, tanba folin foos iha merkadu normál ona. CLN só halo intervensaun bainhira folin foos iha merkadu sa’e. Intervensaun merkadu ne’ebé CLN halo mak fa’an foos ho kada saku 20kg folin $10 no 25kg 12.50.
“Ita mós foin simu dadus husi Alfándega katak husi Janeiru to’o inísiu Outubru, importadór sira hatama foos hamutuk tonelada rihun 111. Aleinde ne’e, ita monitoriza katak presu normál tanba daudaun ne’e foos 20kg folin $10 no 25kg $12.50”, nia dehan.
Totál foos ne’ebé daudaun iha armazein CLN hamutuk tonelada 1.703 tonelada no hare kulit tonelada 1.800.
Notísia relevante: CLN iha stock foos sufisiente atu atende ba situasaun emerjénsia
Jornalista: Arminda Fonseca
Editora: Maria Auxiliadora
