Estudante finalista 2.965 iha Vikeke hahú ezame nasionál 2026
VIKEKE, 19 Outubru 2026 (TATOLI)–Estudante finalista hamutuk na’in-2.965 iha Munisípiu Vikeke hahú tuir ezame nasionál ba tinan 2026 nian, ne’ebé hala’o durante loron haat, husi 19 to’o 22 Outubru.
Diretór Servisu Edukasaun Munisipál Vikeke, António Pinto da Silva, husu ba estudante sira atu tuir ezame ho responsabilidade, kumpre regulamentu no halo esforsu másimu atu hatudu rezultadu husi aprendizajen ne’ebé sira hetan durante períodu estudu.
“Ohin ita hahú ona ezame nasionál iha Munisípiu Vikeke. Ha’u husu ba estudante sira atu tuir ezame ho responsabilidade no kumpre regra sira. Estudante idaidak tenke halo esforsu rasik atu hetan rezultadu ne’ebé di’ak,” António Pinto da Silva dehan ba TATOLI iha Vikeke Vila, Segunda ne’e.
Nia esplika katak estudante sira tenke to’o eskola antes ezame hahú no kumpre oras ne’ebé autoridade edukasaun determina.
António hateten katak estudante sira husi Ensinu Báziku (EB), Ensinu Sekundáriu Jerál (ESG) no Ensinu Sekundáriu Tékniku-Vokasionál (ESTV) sei responde ba matéria sira tuir kurríkulu no nivel ensinu idaidak.
Ba Terseiru Siklu Ensinu Báziku, matéria ezame inklui Matemátika, Inglés, Portugés, Istória no Jeografia, Siénsia Fíziku-Naturál no Tetun.
Enkuantu, ba Ensinu Sekundáriu Jerál, matéria sira inklui Matemátika, Inglés, Portugés, Kímika, Biolojia, Fízika no Tetun. Ba Ensinu Sekundáriu Tékniku-Vokasionál, matéria ezame mak Matemátika, Inglés, Portugés no Biolojia.
António mós esplika katak estudante sira-ne’ebé labele tuir ezame iha primeira xamada tanba moras, dezastre ka razaun espesífika seluk ne’ebé autoridade kompetente simu, bele iha oportunidade atu tuir ezame iha Novembru 2026, tuir regra aplikável.
“Ba estudante sira-ne’ebé iha razaun justifikada no la konsege tuir ezame agora, iha oportunidade atu tuir ezame iha Novembru. Maibé, ba estudante sira-ne’ebé hein xamada tuirmai, ezame bele hala’o fali iha 2027,” nia dehan.
Iha loron primeiru, estudante sira tuir ezame tuir matéria ne’ebé determina ba nivel ensinu idaidak. Ezame nasionál ne’e hahú iha 19 Outubru no sei ramata iha 22 Outubru 2026.
Iha Eskola Sekundária Tékniku-Vokasionál Rabina Lakluta, Diretór eskola, Rosito Soares Morais, informa katak estudante finalista na’in-32 partisipa iha ezame nasionál, kompostu husi estudante feto na’in-11 no mane na’in-21.
“Preparasaun estudante sira ba ezame nasionál ne’e di’ak tebes. Ohin estudante sira partisipa hotu, no ami organiza sira iha sala ezame rua,” Rosito Soares Morais dehan.
Iha Eskola Sekundária Kalixá, Xefe Gabinete Apoiu Tékniku (GAT), Cebestião Godino da Costa, mós relata katak estudante sira prepara an atu tuir ezame nasionál.
Nia hateten katak eskola ne’e iha estudante finalista na’in-127, kompostu husi estudante na’in-61 iha área Siénsia no Teknolojia no na’in-66 iha área Siénsia Sosiál.
Tuir dadus husi Servisu Edukasaun Munisipál Vikeke, estudante finalista na’in-2.965 ne’ebé tuir ezame nasionál tinan 2026 kompostu husi estudante Siklu Terseiru Ensinu Báziku na’in-1.576, Ensinu Sekundáriu na’in-1.282 no Ensinu Sekundáriu Tékniku-Vokasionál na’in-107.
Husi estudante Terseiru Siklu Ensinu Báziku na’in-1.576, estudante feto hamutuk na’in-787 no mane na’in-789.
Ba Ensinu Sekundáriu, estudante na’in-735 tuir área Siénsia no Teknolojia, enkuantu na’in-547 tuir área Siénsia Sosiál no Umanidade.
Enkuantu, husi estudante finalista ESTV na’in-107, estudante mane hamutuk na’in-66 no estudante feto na’in-41.
Kontekstu
Antes ne’e, TATOLI relata iha 09 Outubru 2026 katak Servisu Edukasaun Munisipál Vikeke rejista estudante finalista na’in-2.965 atu partisipa iha Ezame Nasionál 2026. Preparasaun ne’e inklui fahe matríz ezame ba eskola sira atu estudante bele prepara an, no organiza sistema vijilánsia ho profesór husi eskola ida hala’o kna’ar iha eskola seluk atu garante transparénsia durante prosesu ezame.
Lee notísia relevante: Edukasaun Vikeke rejista estudante 2.965 atu partisipa iha ezame nasionál.
Jornalista: Vitorino Lopes da Costa
Editór: Xisto Freitas da Piedade
