Konstrusaun Estádiu padraun FIFA iha Tasi-Tolu sei akumula ema 20.000

DILI, 19 Outubru 2026 (TATOLI)–Prezidente Federasaun Futeból Timor-Leste (FFTL), Nilton Telmo Gusmão dos Santos, informa prosesu harii Estádiu foun iha área protezida no sítiu turístiku relizioja Tasi-Tolu ne’e la’o di’ak tebes.

Notísia Relevante: Bairru rua iha Tasi-Tolu prontu hamamuk fatin ba konstrusaun estádiu nasionál

Nia informa, projetu konstrusaun estádiu ho padraun FIFA ne’e sei akumula ema hamutuk 20.000 no sei la liu husi númeru ne’e, tanba FFTL halo ona estudu no analiza atu evita ema tama barak liu no garante kustu ne’ebé adekuadu.

“Ita sei la harii buat ne’ebé liu fali ita-nia ema sira atu tama iha laran. Ita halo hotu ona estudu, ita halo hotu ona análize, se ita halo husik livre ema tama ne’e ema bele barak maibé ita halo diferensa ho kustu ruma ne’e ema ladun barak mak tama. So ema ne’ebé hadomi duni futeból mak hakarak tama, hakarak duni ho vontade no paixaun hakarak duni haree futeból ne’e, sira sei tama,” Nilton hateten ba jornalista sira iha Otél Timor, Dili, foin lalais ne’e.

Nia afirma katak Estádiu ne’ebé atu harii iha Tasi-Tolu ne’e sei tuir padraun FIFA nian, no sei inklui fasiliade ba maluk defisiente sira atu asesu futeból ho fásil.

“Estádiu ne’ebé atu harii iha Tasi-Tolu ho padraun FIFA nian, ita sei kria kondisaun hotu, sei kria mós fasiliade ba maluk difisiente sira, sira mós tenke iha asesu ba futeból ho fasil, ita halo buat ida inkluzaun, la’ós ba de’it ema-ne’ebé fasil atu asesu ne’e,” nia dehan.

FFTL espera katak iha tinan oin bele hahú ona harii Estádiu ne’e. Fundu sei mai husi FIFA no Governu mós sei kontribui uitoan, maibé hotu-hotu depende ba prosesu rai ne’ebé oras ne’e la’o pozitivu.

“Ita hotu harohan atu nune’e tinan oin bele harii ona Estádiu ne’e, fundu ne’e sei mai husi FIFA, ita-nia Governu mós dalaruma sei tau uitoan, maibé buat hotu depende ba prosesu rai ne’e. Maibé rai ne’e nia prosesu andamentu pozitivu tebes liuliu ha’u hakarak agradese ba komunidade hela iha ne’ebá tanba sira ho sira-nia vontade hakarak hamamuk fatin no sira presiza de’it mak iha indemnizasaun ne’ebé dignu,” nia dehan.

Ba Estádiu foun ne’ebé Tilor-Leste atu konstrui iha Tasi-Tolu ne’e, ninia prosesu andamentu la’o di’ak tebes tanba Ministériu Justisa, Terras no Propriedade tulun barak tebes FFTL iha aspeitu ida-ne’e.

Sira halo ona levantamentu ba dadus ema hira mak hela iha Tasi-Tolu ne’ebá, sira halo ona prosesu indemnizasaun atu bele husik fatin ne’e mamuk, nune’e FFTL bele utiliza harii estádiu foun ne’e.

Nia dehan, kona-ba dezeñu ba Estádiu ne’e, FFTL rona ona opiniaun barak husi sosiedade ne’ebé hadomi futeból, maibé sei halo tuir kondisaun ne’ebé federasaun bele.

“Kona-ba dezeñu Estádiu ne’e ita mós rona opiniaun barak husi sosiedade hadomi futeból, ita sei ajusta buat balu maibé la signifika ita atu halo tuir ema hotu nia hanoin, maibé halo tuir saida mak ita bele,” nia hateten.

Jornalista : Hortêncio Sanchez

Editór        : Cancio Ximenes