MJ prevee millaun $19 iha OJE 2027 hodi rezolve blanku BI no Sertidaun Moris
DILI, 19 Outubru 2026 (TATOLI)—Ministériu Justisa (MJ) prevee ona millaun $19 iha Orsamentu Jerál Estadu (OJE) 2027 hodi rezolve blanku ba Billete Identidade (BI) no Sertidaun Moris (Sertidaun RDTL).
“Iha loron 15 se la sala, ha’u bá ona Komisaun A Parlamentu Nasionál atu defende no aumezmu tempu iha Komisaun Revizaun Polítika Orsamentu 2027 atu haree buat sira ne’e. Ha’u la lembra fiksu didi’ak orsamentu, mas ita prevee millaun $19 iha ne’ebá para ita haree ba Ministériu Justisa hodi kobre ba asuntu sira ne’e,” Ministru Justisa, Sergio Hornai, hateten ba jornalista sira hafoin enkontru ho Primeiru-Ministru, Kay Rala Xanana Gusmão, iha Palásiu Governu, Segunda ne’e.
Notísia relevante : Ministériu Justisa kontinua esforsu hodi halo akizisaun ba blanku dokumentu ofisiál
Governante ne’e dehan, bainhira planu sira ne’e la konsege realiza mak Governu sei kontinua tau prioridade no komprometidu hodi rezolve asuntu ne’e.
“Konserteza ba tinan oin, se tinan oin ita la hetan ba tinan 2028, se labele ba fali Governu sira tuir mai mak bele fó nia kontinuasaun,” nia akresenta.
Ministru hatutan, importante mak agora sistema funsiona di’ak, nune’e buat seluk Governu sei esforsu hodi rezolve.
“Hanesan Ministru dehan katak labele iha interrupsaun iha atendimentu la’o iha serbisu tékniku balun ho serbisu tékniku balun tenke fó solusaun,” nia tenik.
Jornalista : Natalino Costa
Editora : Julia Chatarina
