PNDS Oekusi finaliza ona projetu regular ba suku 12 iha Setembru

OEKUSI, 19 Outubru 2026 (TATOLI) – Diretór Programa Nasionál Dezenvolvimentu Suku (PNDS) Rejiaun Administrativa Espesiál Oekusi Ambeno (RAEOA), João Bobo, informa, projetu PNDS regulár konklui ona iha suku 12 iha fulan-Setembru ne’e, hela de’it suku ualu ho progresu fíziku atuál atinje ona 85,75%.

João Bobo relata, projetu prioridade PNDS 2026 ba Oekusi hamutuk 23 ho fundu infraestrutura rihun $931.000.00, kobre ba suku 20 no sub-rejionál haat.

Nune’e, suku 12 ne’ebé entrega ona ba komunidade sira atu bele utiliza, ezemplu iha sub-rejiaun Pante Makasar, iha suku  sanolu (10) maibé  maibé sia finaliza ona, maka Kapela iha suku Monemeko, enkuantu suku sia sira seluk hanesan, suku Lalisuk, Cunha, Nípani, Costa, Lifau, Kutete, Naimeko, Taiboko no Bobokase finaliza ona.

Iha sub-rejiaun Oésilo maka suku Usitasa’e finaliza ona, hela suku rua, Bobometo no Usitaqueno, sub-rejiaun Nítibe maka Bene-Ufe iha projetu rua, suku Usitako besik atu konklui ne’ebé iha Nítibe hela suku tolu maka seidauk finaliza.

“Tinan ne’e projetu PNDS regulár hamutuk 23 inklui projetu adisionál edifisíu PNDS hamutuk 24 maka tinan ne’e ita halo, maibé suku ualu maka seidauk konklui suku 12 finaliza ona,” nia hateten ba Ajénsia Tatoli,I.P iha Oekusi, ohin.

Notísia relevanate:Tinan ne’e, PNDS Oekusi sei ezekuta projetu 22 ho kustu rihun $900-resin  

Dirijente PNDS Oekusi ne’e, garante katak, suku ualu dadaun ne’e konstrusaun la’o hela, sei finaliza iha antes fulan Dezembru tanba progresu fíziku atuál atinje ona 85,75% no materiál ba konstrusaun kompleta ona iha terrenu.

“Tanba tama ona tempu udan, entaun sei difikulta mobilizasaun maateriál, tanba ne’e ita orienta on aba fornesimentu no traballadór sira katak, tenki finaliza antes Dezembru, sei la finaliza, signifika osan sei devolve fali ba kofre Estadu,” nia afirma.

Notísia relevanate:Tinan ne’e, PNDS Oekusi sei ezekuta projetu 22 ho kustu rihun $900-resin  

Xefe Suku Lifau, Delfino Sole, agradese ba Governu tanba projetu reabilitasaun iha suku Lifau, ho tipu  fui betaun metru-600 no britas metru-300 kompleta ho morru satan rai metru-186 finaliza ona bazeia durasaun serbisu.

“Projetu ida-ne’e la’ós ha’u xefe suku mesak mak husu, maibé povu suku Lifau tau hamutuk hanoin, katak tinan ne’e fó prioridade ba aldeia Postu-Sika, agora ita observa rasik, kompañia finaliza ona,” nia hateten.

Jornalista: Abílio Elo Nini

Editór: Rafael Ximenes de A. Belo