PNTL halo hela investigasaun kazu xineza ida mate iha tasi-ibun Tasi-Tolu
DILI, 19 Outubru 2026 (TATOLI)—Polísia Nasionál Timor-Leste (PNTL) investiga hela sidadaun xineza, Tiago Chen, ne’ebé mate iha tasi-ibun Tasi-Tolu iha Domingu (18/10) maizumenus tuku 07:00 dadeer.
“Investigasaun ba kazu ne’e sei kontinua. Kazu ne’e akontese iha oras oras 07:00, PNTL Eskuadra Dom Alexo simu informasaun kona-ba isin mate ida iha área tasi-ibun Tasi-Tolu,” Komandante PNTL Munisípiu Dili Komisáriu Asistente Polísia Orlando Gomes hateten ba jornalista sira iha nia knaar fatin, Eskudra Dom Aleixo, Segunda ne’e.
Notísia relevante : Governu husu empregadór Xineza atu labele konstrui edifísiu iha trotoar leten
Nia dehan, hafoin hetan tiha mate-isin, patrulla PNTL tun bá fatin akontesimentu hodi asegura lokál krime no kontaktu ekipa forense.
“Ita asegura kedas lokál krime no kontaktu ekipa forense. Depois, ekipa ne’e lori isin mate ba mortuáriu HNGV atu halo autópsia. PNTL sei kontinua investiga kazu ne’e, tanba iha sinál mean balun iha matebian nia isin,” nia relata.
Komisáriu Orlando hateten, PNTL bolu ona matebian nia kaben bá Eskuadra Dom Alexo atu rekolla informasaun. Polísia mós sei bolu tan testemuña sira atu rona informasaun kona-ba kazu ne’e.
“Depoizde rekolla informasaun no simu rezultadu autópsia, PNTL sei aprezenta kazu ne’e ba Ministériu Públiku. Daudaun ne’e, kazu sei iha prosesu investigasaun. Ita seidauk bele konfirma kauza mate,” nia informa.
Jornalista : Natalino Costa
Editora : Julia Chatarina
