Servisu Protesaun Sívil RAEOA tulun ona vítima inséndiu iha Suni-Ufe

OEKUSI, 19 Outubru 2026 (TATOLI) – Diresaun Servisu Rejionál Protesaun Sivíl, Rejiaun Administrativa Espesiál Oekusi Ambeno (RAEOA), segunda ohin, oferese ona apoia hanesan ai-han no la’ós ai-han ba vítima inséndiu ahi han uma iha suku Suni-Ufe sub-rejiaun Nítibe.

Diretór Servisu Rejionál Protesaun Sivíl Oekusi, José Tanesib Anunu, informa katak asaun ne’e liuhusi kooperasaun entre Cruz Vermella Timor-Leste (CVTL) filiál Oekusi no Autoridade Protesaun Sívil (APC), hodi tau matan ba vítima sira.

“Inséndiu ne’e akontese iha loron domingu horsehik, ohin ami halo kedas asaun hodi tulun ita-nia vítima ho família hamutuk na’in-11, ne’ebé presiza tebes atu fó tulun, hodi hakma’an sira-nia nesesidade, ne’ebé ohin ita oferese food item hanesan foos no nesesidade seluk inklui sasán dapur nian,” nia hateten iha suku Suni-Ufe, ohin.

Nia informa, dezde Diresaun Servisu Rejionál Protesaun Sivíl estabelese iha fulan Abríl 2026 ne’e, komesa fulan Maiu hahú hala’o ona atendimentu ba vítima dezastre naturál sira hamutuk uma-kain 40 ona.

Vítima uma-kain 40 ne’e, enfrenta dezastre naturál ho tipu inséndiu ahi han uma, anin bo’ot estraga uma, no balu hetan dezatre husi ai, ne’ebé monu estraga uma.

“Ita konsege apoia sira, maib’e nafatin la sufisiénte tanba ne’e kbi’it Governu nian, ita espera ba futuru fámilia sei hetan materiál rekuperasaun, tanba balu sira-nia uma ahi han mutuk, hanesan materiál konstrusaun,” nia hateten.

Notísia relevante:Konstrusaun uma neen ba vítima inséndiu iha suku Lifau konkluídu

José Bacun, nu’udar vítima, esplika, kona-ba akontesimentu inséndiu ne’e iha loron Domingu madrugada tuku 05:00 dadersan, bainhira nono hela bee, derrepenti ahi sa’e no la konsege salva ai-han.

“Ha’u triste tebes, tanba antes tuku 5:00, ha’u nono hela bee tanba ha’u-nia oan feto foin partu, lakle’ur ha’u mós toba dukur ona, derrepentr de’it ahi sa’e maka’as, tanba bee laiha entaun atu rega oinsá, ne’ebé ha’u salva de’it ropa balun de’it, kon-ba ai-han la konsege salva totál, ne’ebé ohin agradese tanba Governu bele mai haree ha’u ho ha’u-nia susar ida-ne’e, ha’u la ejize maibé Governu mós presiza haree ha’u, atu oinsá bele tau mós ba ha’u-nia hela fatin,” nia hateten.

Notísia relevante:PR Horta apoia nesesidade bázika ho osan ba vítima inséndiu iha Lela-Ufe

Entretantu, tuir dadus ne’ebé Diresaun Servisu Rejionál  Protesaun, rejista durante fulan lima, dadus ahi han uma hamutuk 20, dadus uma monu 20.

Jornalista: Abílio Elo Nini

Editór: Rafael Ximenes de A. Belo