OEKUSI, 30 Marsu 2025 (TATOLI) – Prezidente Repúblika (PR), José Manuel Ramos Horta, apoia nesesidade bázika hanesan hahán no la’os ai-han inklui osan $500 ba vítima inséndiu uma no labarik minoridade ida iha bairru Huaknutu, aldeia Kuat-Enes, suku Lela-Ufe, sub-rejiaun Nítibe, Rejiaun Administrativa Espesiál Oekusi Ambeno (RAEOA).
Xefe ekipa apoia nesesidade bázika husi Gabinete Prezidnete Repúblika, Felis de Deus Alves, informa apoia umanitária ne’e nu’udar domin husi Prezidente Repúblika atu hakma’an sofrimentu vítima ho nia família sira.
Notísia relevante:Inséndiu hamate Fernando Punef iha suku Lela-Ufe
“Inséndíu ne’ebé akontese ahi-han uma rezulta mós alin-oan ida mate, informasaun referidu, Prezidente Repúblika mós akompaña ne’e tuir mídia sosiál, nune’e orienta kedas ami, ohin mai to’o fatin ne’e haree kondisaun no lori mós nesesidade atu bele hakma’an sofrimentu vítima ne’ebé infrenta dezastre ne’e. tan ne’e sasán ne’ebé Prezidente Repúblika apoia mak, nesesidade bázika ai-han balun, no la’ós ai-han hanesan manta, ropa, kama ho kulsaun, kadeira, sasán dapur nian inklui orsamentu balun, nune’e bele rekupera fila-fali vítima nia tristeza” nia ko’alia iha ámbitu oferese apoia sir aba vítima iha suku Lela-Ufe.
Biban ne’e, ekipa Prezidente Repúblika mós observa direita kondisaun uma ne’ebé hetan inséndiu mutuk totál, nune’e sei hato’o ba superior hodi bele konsidera atu tau matan ba uma referidu.
“Ita haree direita iha uma ne’e, katak grave duni, kona-ba palasíu Prezidenti ita la promete maibé Prezidente Repúblika mós iha ekipa atu halo konstrusaun ba uma kbi’it la’ek sira, tan ne’e ha’u la promete maibe ha’u sei hato’o ba ami-nia superiór sira mak foti desizaun ba tanba iha ne’e komunidade lad’un barak, atu mud aba família seluk mós susár tan ne’e sei hato’o ba superior atu deside,” nia hateten.
Autoridade no familia vítima agradese
Iha fatin hanesan Xefe aldeia Kuat-Enes, suku Lela-Ufe, Minguel Auni Oqui, hato’o agradesimentu ba Prezidente-Repúblika tanba tau matan ba vítima inséndiu, nune’e nia rekomenda atu kontinua tau matan ba vítima nia hela fatin ne’ebé, ahi-han mutuk nia uma ho labarik ida ho idade tinan 10.
“Tan ne’e, Ha’u rekomenda atu tau-matan, tanba nia kalen atu taka uma mós ahi-han hotu, daudaun ne’e família dada de’it lona ida hodi hela maibé agora tempu udan, ne’ebé susar tebes atu hela ho dignu, tanba ne’e ha’u husu ba oin bele apoia konstrui nia hela fatin,” nia rekomenda.
Entretantu, Vítima inséndiu, Miliquior Punef, konta sente orgullu no hato’o agradese ba Prezidente-Repúblika tanba maske husi dalan ho situasaun udan, maibé konsege lori apoia to’o fatin akontesimentu.
“Ha’u fó obrigado ba Prezidente Repúblika Avo Ramos Horta, nia hanoin ha’u no la haluha tanba nia povu mak ha’u, ekipa Prezidente-Repúblika maske kondisaun dalan ladi’ak, mai husi nasionál, tanba ha’u-nia oan ahi-han mutuk iha akontesimentu ne’e, biar dalan do’ok, rai tahu iha estrada maibé konsege lori ajuda mai to’o ami-nia fatin,” nia afirma.
Entretantu, antes ne’e Autoridade Protesaun Sivíl (APC) Oekusi, hala’o ona verifikasaun no rejista katak, insendíu ne’e konsidera aat totál, nune’e família vítima sei hetan materiál konstrusaun husi Governu Timor-Leste.
Notísia relevante:SEPS apoia vítima inséndiu no inundasaun uma-kain 40 iha RAEOA
Jornalista: Abílio Elo Nini
Editór: Florencio Miranda Ximenes
