OÉ-CUSSE, 25 fevereiru 2022 (TATOLI) – Iha fulan-janeiru to’o fevereiru 2022 ne’e, Sekretaria Estadu Protesaun Sivíl (SEPS) liuhosi Diresaun Nasionál Jestaun Risku Dezastre, apoia ona vítima dezastre inséndiu no inundasaun hamutuk uma-kain 40 iha Rejiaun Administrativa Espesiál Oé-Cusse Ambeno (RAEOA).
“Parte protesaun sivíl RAEOA ne’ebé serbisu ba jestaun dezastre nian, durante ita esforsu oferese ona apoia emerjénsia food item, non food item ba vítima sira hahú janeiru to’o fevereiru 2022 ne’e hamutuk na’in-40, ho tipu dezastre inséndiu ka ahi han uma, inundasaun no anin sobu uma maibé númeru uitoan,” Koordenadór Jestaun Risku Dezastre Naturaál, Domingos Meni, informa ba Agência Tatoli iha Santa Rosa, Oé-Cusse, sesta ne’e.
Nia fó-sai katak, iha janeiru atende vítima sira hamutuk uma-kain 10 ho tipu dezastre rua, primeiru ahi-han ka inséndiu hamutuk uma-kain tolu, ida iha suku Lela-Ufe, sub-rejiaun Nítibe, iha sub-rejiaun Pante Makasar, ida iha suku Taiboko no suku Costa, daruak tipu dezastre anin sobu uma hela-fatin, hamutuk uma-kain-neen, haat iha suku Taiboko rua iha suku Costa.
Purtantu, iha fevereiru ne’e hamutuk uma-kain 30, ho tipu dezastre inundasaun iha aldeia Nianapu, suku Bobometo sub-rejiaun Oésilo hamutuk uma-kain neen, iha udan-boot akontese iha semana ne’e, konsege apoia vítima inundasaun iha suku Lifau, no seluk balu iha sub-rejiaun Nítibe no Pante Makasar ne’ebé maioria enfrenta dezastre inséndiu no inundasaun.
“Ita apoia seidauk másima liuliu área remota sira, tanba difikuldade transporte, maibé ami esforsu nafatin, atende vítima sira-ne’ebé presiza tulun urjente, hanesan food item mak hanesan, biskuit, supermie, foos, ikan-lata, susu-been, non food item mak hanesan, lona, sanan, bikan-kanuru, tasu, balde sabaun no sasán dapur seluk,” nia katak.
Jornalista : Abílio Elo Nini
Editór : Evaristo Soares Martins
